Cristiano Ronaldo ត្រូវបានគេរាយការណ៍ថា បានបញ្ជូនសម្ភារៈថែទាំតាមយន្តហោះទៅឲ្យជនរងគ្រោះដោយការរញ្ជួយដីនៅស៊ីរី និងតួកគី។

អតីតតារាឆ្នើមរបស់ក្រុម Manchester United រូបនេះបានសម្ដែងការសោកស្ដាយយ៉ាងខ្លាំងដោយសោកនាដកម្មដែលបានបន្សល់ទុកចំនួនអ្នកស្លាប់យ៉ាងច្រើន និងប៉ះពាល់ដល់អាយុជីវិតមនុស្សយ៉ាងធ្ងន់ធ្ងរ។ ហើយ Ronaldo បានបញ្ជូនយន្តហោះដែលពោរពេញដោយជំនួយទៅកាន់តំបន់ដែលត្រូវបានបំផ្លិចបំផ្លាញដោយគ្រោះមហន្តរាយ ខណៈដែលគេមើលទៅដើម្បីជួយអ្នកដែលរងផលប៉ះពាល់។

វីរបុរសរបស់ព័រទុយហ្គាល់បានចំណាយប្រាក់សម្រាប់ តង់ កញ្ចប់អាហារ ខ្នើយ និងភួយ គ្រែ អាហារទារក និងទឹកដោះគោ និងការផ្គត់ផ្គង់វេជ្ជសាស្រ្តដើម្បីជួយដល់កិច្ចខិតខំប្រឹងប្រែងមនុស្សធម៌។ ទំនិញត្រូវបានបញ្ជូនទៅប្រទេសទួរគី និងស៊ីរី។

គេរំពឹងថាកាយវិការរបស់ Ronaldo នឹងលើកទឹកចិត្តអ្នកលេងកីឡាផ្សេងទៀតឲ្យធ្វើតាមក្នុងរយៈពេលប៉ុន្មានថ្ងៃ និងសប្តាហ៍ខាងមុខ។

ជាមួយគ្នានេះ ក៏មានខ្សែវីដេអូបានលេចចេញកាលពីថ្ងៃសុក្ររបស់ Ronaldo ស្វាគមន៍ក្មេងប្រុសសញ្ជាតិស៊ីរីម្នាក់ដែលបាននិយាយថាវាជាសុបិនរបស់គេក្នុងការជួបអតីតខ្សែប្រយុទ្ធ Real Madrid។ វាមិនមែនជាលើកទីមួយទេដែល Ronaldo បរិច្ចាគសប្បុរសធម៌បែបនេះ។

Ronaldo ធ្លាប់បានចំណាយប្រាក់ចំនួន ៨៣,០០០ដុល្លារ ដើម្បីចំណាយលើការវះកាត់ខួរក្បាលរបស់កុមារ និងបានបរិច្ចាគប្រាក់ចំនួន ១៦៥,០០០ដុល្លារ ដើម្បីជួយឧបត្ថម្ភដល់មជ្ឈមណ្ឌលមហារីកនៅប្រទេសព័រទុយហ្គាល់ដែលជាប្រទេសកំណើតរបស់ខ្លួន។

ខ្សែប្រយុទ្ធដែលមានតួនាទីជាទូតសុឆន្ទះសម្រាប់កម្មវិធី Save the Children, របស់អង្គការ Unicef និង World Vision ក៏បានបរិច្ចាគប្រាក់ចំនួន ១លានផោនដល់មន្ទីរពេទ្យព័រទុយហ្គាល់ ក្នុងអំឡុងពេលនៃការរីករាលដាលនៃជំងឺឆ្លងកូវីដ-១៩ ផងដែរ៕

ប្រភព៖ dailymail.co.uk

អត្ថបទ៖ មន្នីរ័ត្ន