កីឡា

គ្រូទីម័រ៖ ក្រុមលោកនឹងប្រកួតដោយរីករាយ មិនខ្លាចការដាក់សម្ពាធពីម្ចាស់ផ្ទះកម្ពុជា

បានផុស

៣ years មុន

នៅ

ថ្ងៃសុក្រ ២៨ មេសា ២០២៣

ដោយ

ខណៈដែលក្រុមបាល់ទាត់ជម្រើសជាតិទីម័រ នឹងប្រកួតបើកឆាកជួបជាមួយកម្ពុជានៅថ្ងៃស្អែកនេះ គ្រូបង្វឹកក្រុមទីម័របានលើកឡើងថា កូនក្រុមរបស់លោករីករាយគ្រប់ការប្រកួត ហើយមិនភ័យខ្លាចការដាក់សម្ពាធពីក្រុមម្ចាស់ផ្ទះកម្ពុជានោះទេ។

លោក Park Soon Tae គ្រូរបស់ជម្រើសជាតិទីម័រ

លោក Park Soon Tae គ្រូរបស់ជម្រើសជាតិទីម័របន្តថា កូនក្រុមរបស់លោកបានហ្វឹកហាត់ត្រៀមជាច្រើនខែ សម្រាប់ប្រកួតក្នុងព្រឹត្តិការណ៍ស៊ីហ្គេមទាំងមូលមិនថាត្រូវប៉ះជាមួយក្រុមកម្ពុជា និងក្រុមដទៃទៀតនោះទេ។ ដូច្នេះក្រុមលោករីករាយសម្រាប់ជំនួបជាមួយកម្ពុជាដែលជាម្ចាស់ផ្ទះ ហើយនឹងប្រឹងប្រែងស្វែងរកលទ្ធផលដ៏ល្អសម្រាប់ប្រកួតថ្ងៃស្អែកនេះ។

ដោយឡែកគ្រូបង្វឹកក្រុមជម្រើសជាតិកម្ពុជាសញ្ជាតិជប៉ុនលោក Ryu Hirose ក៏មិនបានមើលស្រាលសម្រាប់ជំនួបជាមួយក្រុមទីម័រ ខណៈដែលការប្រកួតនេះលោកមើលឃើញក្រុមទាំងពីរមានឱកាសឈ្នះដូចគ្នា។

គ្រូបង្វឹកសញ្ជាតិជប៉ុនរូបនេះបញ្ជាក់ថា កម្ពុជាទោះបីមានប្រៀបក្នុងនាមជាម្ចាស់ផ្ទះ ប៉ុន្តែក៏មិនអាចមើលស្រាលសម្រាប់ការប្រកួតខាងមុខ ដែលក្រុមទាំងពីរសុទ្ធតែមានឱកាសឈ្នះដូចគ្នា។

សម្រាប់ការប្រកួតបើកឆាកជាមួយទីម័រនៅថ្ងៃស្អែកនេះ គ្រូបង្វឹក្រុមជម្រើសជាតិកម្ពុជាបានដាក់កីឡាករខ្សែប្រយុទ្ធវ័យក្មេង សៀង ចន្ធា ជាប្រធានក្រុមដឹកនាំក្រុមគោព្រៃកម្ពុជា។

គួរបញ្ជាក់ថា ក្រុមគោព្រៃកម្ពុជាស្ថិតនៅក្នុងពូល A ដែលមានក្រុមខ្លាំងដូចជា ឥណ្ឌូណេស៊ី មីយ៉ាន់ម៉ា ហ្វីលីពីន ទីម័រខាងកើត។ កម្ពុជានឹងប្រកួតបើកឆាកជាមួយទីម័រខាងកើតនៅវេលាម៉ោង ៧ យប់ ស្អែកនេះ នៅពហុកីឡដ្ឋានជាតិអូឡាំពិក៕