កីឡា

រូបភាពយុវជនខ្មែរ-បារាំង Loic Chan កំពុងហ្វឹកហាត់ជាមួយក្រុមU23កម្ពុជា

បានផុស

២ years មុន

នៅ

ថ្ងៃអង្គារ ៨ សីហា ២០២៣

ដោយ

យុវជនខ្មែរ-បារាំង Loic Chan កំពុងហ្វឹកហាត់ជាមួយក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ (U23) ដើម្បីត្រៀមទៅប្រកួតជើងឯកយុវជនអាស៊ាន AFF U23 Championship ឆ្នាំ២០២៣ នៅប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Loic Chan ជាកូនប្រុសរបស់លោក Maurice Chan ជាជនជាតិខ្មែរ-បារាំងដែលជាតារាសម្តែងក្បាច់គុននៅហូលីវូដ ដូច្នេះរូបគេបានជ្រើសរើសយកជម្រើសជាតិកម្ពុជា។ បច្ចុប្បន្ន យុវជនរូបនេះអាយុទើប១៨ឆ្នាំដែលជាសមាជិកក្រុមយុវជនរបស់ក្លិបបាល់ទាត់អេស្ប៉ាញ RCD Mallorca។

បន្ទាប់ពីត្រូវបានប្រកាសឈ្មោះ U23 កាលពីសប្តាហ៍មុន រូបគេបានចាប់ផ្តើមហ្វឹកហាត់ជាមួយក្រុមកាលពីល្ងាចថ្ងៃចន្ទ ទី៧ ខែសីហា នៅទីលានក្នុងបរិវេណពហុកីឡដ្ឋានជាតិមរតកតេជោ។

កាលពីល្ងាចថ្ងៃអាទិត្យ រូបគេបានទៅទស្សនាការប្រកួតរវាង ក្រសួងការពារជាតិ និងព្រះខ័នរាជស្វាយរៀង នៅស្តាតចាស់ ដែលអង្គុយជាមួយកីឡាករ ធារី ចន្ថាប៊ីន។ សមាជិកព្រះខ័នរាជស្វាយរៀង ធារី ចន្ថាប៊ីន បានប្រាប់ថា ខ្លួនបានជួយ Loic Chan ដោយសារយុវជនខ្មែរ-បារាំងរូបនេះមិនចេះនិយាយភាសាខ្មែរ និងអង់គ្លេស ដូច្នេះពិបាកក្នុងការទំនាក់ទំនង។

កាលពីដើមខែសីហានេះ លោក Maurice បានប្រាប់«កម្ពុជាថ្មី»ថា កូនប្រុសរបស់លោកមិនទាន់មានឯកសារផ្លូវការទេ។ ទាល់តែមានឯកសារផ្លូវការដែលរៀបចំដោយសហព័ន្ធកីឡាបាល់ទាត់កម្ពុជាទើបអាចធ្វើដំណើរជាមួយក្រុម U23 ទៅប្រទេសថៃបាន ប៉ុន្តែកូនប្រុសរបស់លោកបានចូលហ្វឹកហាត់ជាមួយក្រុមយុវជនកម្ពុជានៅដើមសប្តាហ៍នេះហើយ។

ការប្រកួតជើងឯកយុវជនអាស៊ាន AFF U23 Championship នឹងចាប់ផ្តើមពីថ្ងៃទី១៧ ដល់ទី២៦ ខែសីហា ឆ្នាំ២០២៣ នៅប្រទេសថៃ។ ក្រុម U23 កម្ពុជា ស្ថិតនៅពូល A ដែលមានម្ចាស់ផ្ទះថៃ មីយ៉ាន់ម៉ា និងព្រុយណេ ខណៈពូលB មានឥណ្ឌូណេស៊ី ម៉ាឡេស៊ី និងទីម័រខាងកើត ហើយពូល C មានវៀតណាម ហ្វីលីពីន និងឡាវ៕