ក្លិប Young Elephants អរគុណឯកឧត្តម ឌី វិជ្ជា ដែលទទួល​ស្វាគមន៍ជាពិសេស

ក្លិបបាល់ទាត់ជើងឯកលីគកំពូលឡាវ Young Elephants បានអរគុណដល់ឯកឧត្តម ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិ និងជាប្រធានក្លិបបាល់ទាត់ព្រះខ័នរាជស្វាយរៀងដែលបានទទួលស្វាគមន៍យ៉ាងកក់ក្តី ក៏ដូចជាចូលរួមទស្សនាការប្រកួតរបស់ក្លិប Young Elephants ជាមួយភ្នំពេញក្រោន ដោយ​បាន​ចាញ់​ម្ចាស់​ផ្ទះ ៣-០ នាល្ងាចថ្ងៃទី១៦ ខែសីហា ឆ្នាំ២០២៣ នៅកីឡដ្ឋានស្មាតអអេសអិន។

ផេករបស់ក្លិប Young Elephants បានសរសេរថា ៖«យើងខ្ញុំ (ក្លិបឈ្មោះជាភាសាឡាវ Xangnoy Club) ពិតជាមានកិត្តិយសដ៏ខ្ពង់ខ្ពស់ដែលទទួលបានស្វាគមន៍យ៉ាងពិសេសពីឯកឧត្តម ឌី វិជ្ជា ប្រធានក្លិបបាល់ទាត់ព្រះខ័នរាជស្វាយរៀង។ យើងខ្ញុំមានអារម្មណ៍កក់ក្តៅ និងស្វាគមន៍។ ជួបគ្នាលើកក្រោយទៀត សូមអរគុណ»។

ទំនាក់ទំនងក្រុមការងារក្លិបបាល់ទាត់ Young Elephants និងក្រុម​ការងារ​ក្លិបបាល់ទាត់ព្រះខ័នរាជស្វាយរៀងបានកើតមានឡើងយ៉ាងស្និទ្ធស្នាល បន្ទាប់ពីក្លិបដែលមានមូលដ្ឋាននៅខេត្តស្វាយរៀងបាននាំចូលកីឡាករ Bounphachan Bounkong សមាជិកក្រុមជម្រើសជាតិឡាវ និងជាប្រធានក្រុម Young Elephants កាលពីខែកក្កដា ឆ្នាំ២០២៣នេះ។

បន្ទាប់ពីបានចូលរួមជាមួយក្លិបនេះនៅកម្ពុជា កីឡាករ Bounphachan បានបង្ហាញខ្លួនឲ្យព្រះខ័នរាជស្វាយរៀងពីរដងហើយក្នុងការប្រកួតលីគកំពូលកម្ពុជាពីរសប្តាហ៍ដំបូង៕

អត្ថបទ៖ វីរបុត្រ