ស្ថានភាពគាំងបេះដូងរបស់កីឡាករ Tom Lockyer នៅលើទីលានល្អប្រសើរ

ប្រធានក្រុម Luton Town កីឡាករ Tom Lockyer បានធូរស្រាលហើយ បន្ទាប់ពីមានបញ្ហាគាំងបេះដូងនៅលើទីលាន នៅ​ពេល​ប្រកួតជាមួយ AFC Bournemouth ក្នុង​លីគ​កំពូល​អង់គ្លេស Premier League កាលពីថ្ងៃសៅរ៍ ទី​១៦ ខែ​ធ្នូ ឆ្នាំ​២០២៣។

ការប្រកួតត្រូវបាន​ផ្អាកដំបូងប្រហែល​២០នាទី ប៉ុន្តែ​ក្រោយមក​ការប្រកួត​ត្រូវបានលុបចោលទាំងស្រុង​​ តាមការ​បញ្ជាក់របស់ Premier League។

ក្នុងសេចក្តីថ្លែងការណ៍​របស់ក្លិប Luton Town បាន​លើក​ឡើង​ថា ៖«បុគ្គលិកពេទ្យរបស់យើងបានបញ្ជាក់ថា ប្រធានក្រុមកីឡាករ Tom Lockyer បាន​គាំងបេះដូងនៅលើទីលាន​ក្នុង​ពេល​​ប្រកួត។ គាត់បានទទួលការសង្គ្រោះបឋម​បន្ទាន់ភ្លាមៗ នៅ​កីឡដ្ឋាន។ ពួកយើង​សូមអរគុណ​ក្រុមគ្រូពេទ្យរបស់ក្រុមទាំង២ដែលបានព្យាយាមជួយសង្គ្រោះ។ Tom ត្រូវបានបញ្ជូនទៅមន្ទីរពេទ្យ។ យើងអាចធានាដល់អ្នកគាំទ្រថា ពេល​នេះ ស្ថានភាពរបស់គាត់មានភាពល្អប្រសើរហើយ បច្ចុប្បន្នកំពុងទទួលការធ្វើតេស្តបន្ថែម»។

ក្រោយ​មក សេចក្តីថ្លែងការណ៍ក្លិប Luton Town មួយ​ទៀតបាន​បញ្ជាក់ថា កីឡាករ Tom Lockyer អាច​ឆ្លើយតបទៅ​អ្នកគាំទ្រ​បាន​ហើយ ហើយ​សូម​អរគុណ​ដល់​អ្នក​គាំទ្រ»។

កីឡាកររបស់ក្រុមទាំង២ មិនមានស្មារតី​បន្តការប្រកួតនេះទេ បន្ទាប់ពីបានឃើញមិត្តរួមក្រុម និងមិត្តរួមអាជីព​កើត​មាន​ស្ថានភាព​បែប​នេះ។ ក្លិប Luton Town ក៏បានថ្លែងអំណរគុណដល់អ្នកគាំទ្រ​ដែល​បាន​ជូន​ពរ និង​បារម្ភ​ពី​ Tom Lockyer នៅ​ក្នុងកីឡដ្ឋាន។

ក្លិប Bournemouth បាននិយាយថា ៖«យើងមានអារម្មណ៍ធូរស្រាល ពេល​បាន​ដឹង​ថា Tom Lockyer អាច​ឆ្លើយ​តប​នឹង​អ្នក​គាំទ្រ​បាន។ យើងនឹងបន្តនៅជាមួយ​គាត់​ និងគ្រួសាររបស់គាត់​ជានិច្ច។ យើងសូមថ្លែងអំណរគុណដល់​ក្រុម​គ្រូ​ពេទ្យទាំងអស់​ដែល​បាន​​យក​ចិត្ត​ទុក​ដាក់ព្យាបាល»៕

ប្រែមសម្រួល៖ ផា រតនា
ប្រភព៖ CNN