កីឡា

ហ្សកដានីបង្កើតប្រវត្តិសាស្ត្រដំបូងឡើងវគ្គផ្តាច់ព្រ័ត្រ AFC Asian Cup

បានផុស

៥ ខែ មុន

នៅ

ថ្ងៃពុធ ៧ កុម្ភៈ ២០២៤

ដោយ

ក្រុមបាល់ទាត់ជម្រើសជាតិហ្សកដានីបានធ្វើឲ្យអ្នកគាំទ្រមានការភ្ញាក់ផ្អើលយ៉ាងខ្លាំងតាមរយៈជ័យជម្នះ ២-០ លើក្រុមជើងឯកពីរសម័យកាល កូរ៉េខាងត្បូង នៅវគ្គពាក់កណ្តាលផ្តាច់ព្រ័ត្រ នៅយប់ថ្ងៃទី៦ ខែកុម្ភៈ ឆ្នាំ២០២៤ ដើម្បីឡើងទៅកាន់វគ្គផ្តាច់ព្រ័ត្រជាលើកដំបូងជើងឯកអាស៊ី AFC Asian Cup 2023។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហ្សកដានីកំពុងធ្វើដំណើរយ៉ាងល្អជាមួយនឹងប្រព័ន្ធការពារដ៏រឹងមាំ និងខ្សែប្រយុទ្ធដ៏មុតស្រួច។ នៅវគ្គពាក់កណ្តាលផ្តាច់ព្រ័ត្រយប់មិញនេះ ពួកគេមិនសូវជាសម្រុកខ្លាំងទេ ប៉ុន្តែឱកាសម្តងៗគឺខ្សែការពារកូរ៉េខាងត្បូងពិបាកបិទខ្លាំងមែនទែន។

នៅវគ្គប្រកួតសំន្សពិន្ទុក្នុងពូល ពួកគេបានប្រកួត៣លើក ឈ្នះ១ ស្មើ១ ចាញ់១ មាន៤ពិន្ទុលេខ៣ និងបានឡើងដល់វគ្គ១៦ក្រុមចុងក្រោយក្នុងនាមជាក្រុមលេខ៣ល្អប៉ុណ្ណោះ។ នៅវគ្គ១៦ក្រុមចុងក្រោយ ហ្សកដានីបានយកឈ្នះក្រុមខ្លាំងអ៉ីរ៉ាក់ ៣-២។ បន្ទាប់មកនៅវគ្គ៨ក្រុមចុងក្រោយ ពួកគេបានបន្តឈ្នះតាជីគីស្ថាន ១-០។

នៅវគ្គ៤ក្រុមចុងក្រោយ ហ្សកដានីបានយកឈ្នះក្រុមខ្លាំងកូរ៉េខាងត្បូង ២-០ ដើម្បីឡើងវគ្គផ្តាច់ព្រ័ត្រជាលើកដំបូងគិតចាប់តាំងពីធ្លាប់ចូលរួមប្រកួតដល់វគ្គសន្សំពិន្ទុក្នុងពូល៤ដង។ ឆ្នាំ២០០៤ ពួកគេបានឡើងវគ្គ៨ក្រុមចុងក្រោយ, ឆ្នាំ២០១១បានឡើងដល់វគ្គ៨ក្រុមចុងក្រោយ, ឆ្នាំ២០១៥ បានធ្លាក់ក្នុងវគ្គសន្សំពិន្ទុក្នុងពូល ហើយឆ្នាំ២០១៩បានឡើងដល់វគ្គ១៦ក្រុមចុងក្រោយ។

នៅឆ្នាំ២០១៧ ពួកគេមិនបានជាប់វគ្គជម្រុះទេ ហើយគិតចាប់តាំងពីឆ្នាំ១៩៧២ រហូតដល់ឆ្នាំ២០០០ ពួកគេក៏ធ្លាក់ត្រឹមវគ្គជម្រុះដែរ៕