កីឡា

គណៈកម្មាធិការរៀបចំស៊ីហ្គេម២០២៣ ពិភាក្សា និងត្រួតពិនិត្យលើវឌ្ឍនភាពគណៈកម្មការពិធីបើក-ពិធីបិទ និងការត្រៀមរៀបចំការរត់ភ្លើងគប់

បានផុស

៦ years មុន

នៅ

ថ្ងៃសុក្រ ១៦ តុលា ២០២០

ដោយ

លោក វ៉ាត់ ចំរើន មានប្រសាសន៍ឲ្យដឹងថា នៅក្នុងកិច្ចប្រជុំគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ២០២៣ ហៅកាត់ គ.ជ. ប.អ (CAMSOC) កាលពីម្សិលមិញ បានពិភាក្សា និងត្រួតពិនិត្យ លើវឌ្ឍនភាពគណៈកម្មការពិធីបើក-ពិធីបិទ ស៊ីហ្គេម ២០២៣ និងការត្រៀមរៀបចំការរត់ភ្លើងគប់។

ពាក់ព័ន្ធនឹងកិច្ចពិភាក្សាអំពីបញ្ហាខាងលើនេះ អគ្គលេខាធិការ វ៉ាត់ ចំរើន បញ្ជាក់ថា សម្រាប់ពីការរៀបចំពិធីបើក-បិទ ស៊ីហ្គេម លើកទី៣២ ឆ្នាំ២០២៣ យើងមានគណៈកម្មការជំនាញរបស់ខ្លួន ដោយមានក្រសួងវប្បធម៌ និងវិចិត្រសិល្បៈ ដែលជាអ្នកជំនាញ ដែលមានព្រឹទ្ធាចារ្យ រដ្ឋលេខាធិការ ដែលជាក្រុមការងារពិសេសជួយជ្រោមជ្រែងរៀបចំពិធីបើកបិទនេះ ដោយលោកស្រីរដ្ឋមន្ត្រីក្រសួងវប្បធម៌បានគាំទ្រ និងជំរុញយ៉ាងខ្លាំងដល់ការរៀបចំនេះ។

លោក វ៉ាត់ ចំរើន បានបន្តថា ការរៀបចំជាកម្លាំងនេះមានលទ្ធផលល្អ ហើយការបញ្ជាក់បន្ថែមរបស់លោកបណ្ឌិត ថោង ខុន ដែលជាប្រធានអង្គប្រជុំ បានដាក់ចេ ញឲ្យដំណើរការនាពេលខាងមុខឆាប់ៗនេះ ដោយឲ្យធ្វើការឲ្យបានរួចរាល់ នៅក្នុងកិច្ចសហការប្រឹក្សាយោបល់ពីភាគីចិនជាមួយខាងជំនាញវប្បធម៌កម្ពុជា។

លោកអគ្គលេខាធិការបន្ថែមថា ព្រឹទ្ធាចារ្យវប្បធម៌ ជាអ្នករៀបចំ និងបង្ហាញនូវរបៀបរបប នៃអរិយធម៌ដ៏រុងរឿងរបស់ខ្មែរតាំងពីបុរាណរហូតដល់បច្ចុប្បន្ន និងរំលេចចេញមកដល់នយោបាយឈ្នះៗ ដែលជាសម័យរុងរឿងសម័យតេជោរបស់យើង។

ពិធីបើកបិទនេះ គឺយើងត្រូវធ្វើយ៉ាងណាឲ្យមានការទទួលខុសត្រូវ ការប្រទាក់ក្រឡាជាមួយនឹងស្ថាប័នពាក់ព័ន្ធផ្សេងៗទៀត ដោយ លោក ថោង ខុន បានសង្កត់ធ្ងន់ឲ្យយើងកំណត់ឲ្យហើយថាតើយើងត្រូវប្រមែលប្រមូលធនធានមនុស្សមកពីស្ថាប័នណាខ្លះ ដើម្បីត្រៀមឲ្យពិធីបើក-បិទនេះមានធនធានមនុស្សគ្រប់គ្រាន់ ដូច្នេះពិធីបើក-បិទនេះត្រូវការទាំងអ្នកជំនាញ ត្រូវកាធនធានមនុស្សសម្រាប់ការហ្វឹកហាត់ត្រៀមដែលត្រូវចាប់ផ្តើមពីឆ្នាំក្រោយនេះរហូតដល់ឆ្នាំ២០២៣តែម្តង។

សម្រាប់សមាសភាពចូលរួមសម្តែងក្នុងពិធីបើក-បិទនេះ គឺមានខាងកងយោធពលខេមរភូមិន្ទ ដែលចំបាច់ត្រូវមានចំនួនដ៏ច្រើន រួមទាំងខាងក្រសួងវប្បធម៌ និងវិចិត្រសិល្បៈ ជាអ្នកជំនាញ ព្រមទាំងត្រូវ ការសមាសភាពធនធានមួយចំនួនទៀតពីក្នុងចំណោមយុវជន ដែលជាសិស្សនិស្សិតរបស់យើង។

ការបង្ហាញនៅក្នុងពិធីបើកបិទនេះ គឺយើងត្រូវសង្កត់ធ្ងន់ទៅលើការបង្ហាញពីមូលដ្ឋានគ្រឹះ ភាពអស្ចារ្យនៃអរិយធម៌ វប្បធម៌របស់យើង ដែលក្រសួងវប្បធម៌ និងវិចិត្រសិល្បៈកំពុងរៀបចំនូវភាពលម្អិត ដើម្បីបង្ហាញចេញនូវភាព «ឯក» នៅក្នុងវប្បធម៌ខ្មែរ។ «នៅក្នុងពិធីបើកបិទនេះ យើងបានរៀបចំជាគ្រោងរួចរាល់អស់ហើយៗមានប្រក្រតីទិនពិធីបើកបិទរួចដែរ ហើយនៅថ្ងៃនេះយើងបានចុះហត្ថលេខាលើប្រក្រតីទិនការងារនៃពិធីបើកបិទ ដែលយើងបានផ្តល់ជូនដល់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC ដើម្បីសម្រេចចុងក្រោយ ដែលប្រក្រតីទិននេះមានតាមលំដាប់លំដោយ ប្រយោជន៍ផ្តល់ភាពងាយស្រួល ក្នុងការតាមដាន ត្រួតពិនិត្យ និងវាយតម្លៃនូវវឌ្ឍនភាពការងារជាបន្តបន្ទាប់»។ នេះបើតាមបញ្ជាក់ឲ្យដឹងពី លោក វ៉ាត់ ចំរើន។

ចំពោះរបៀបវារៈទី២ ដែលផ្តោតសំខាន់លើការរត់ភ្លើងគប់ស៊ីហ្គេម ឆ្នាំ២០២៣ នេះ លោក វ៉ាត់ ចំរើន បញ្ជាក់ថា យើងបានកំណត់នូវពេលវេលាច្បាស់លាស់រួចរាល់ហើយដែរ ហើយនៅសប្ដាហ៍ក្រោយៗទៀត យើងនឹងលម្អិតនូវកម្មវិធីរត់ភ្លើងគប់នេះ ដែលត្រូវប្រារព្ធពិធីសុំភ្លើងគប់ពីព្រះអាទិទេពរួចហើយត្រូវរត់នៅក្នុងព្រះរាជាណាចក្រកម្ពុជាចេញទៅបណ្តាប្រទេសទាំង១០ផ្សេងទៀត ដែលជាសមាជិកអាស៊ីអាគ្នេយ៍ ហើយរត់ចូលមកកម្ពុជាវិញ រហូតដល់ពិធីបើកផ្លូវការស៊ីហ្គេម លើកទី៣២ ឆ្នាំ២០២៣ នៅពហុកីឡដ្ឋានជាតិមរតកតេជោ រាជធានីភ្នំពេញ៕
អត្ថបទ ៖ វិសិទ្ធ

Related Topics: