កីឡា

កម្ពុជាចាប់ផ្តើមរៀបចំប្រដាល់សកលអាជីពស្តង់ដា WBC ចុងខែនេះ

បានផុស

២ years មុន

នៅ

ថ្ងៃសុក្រ ២៣ កុម្ភៈ ២០២៤

ដោយ

សហព័ន្ធកីឡាប្រដាល់សកលកម្ពុជា និងគណៈកម្មការប្រដាល់សកលអាជីពកម្ពុជា (CPBC) នឹងរៀបចំព្រឹត្តិការណ៍ប្រកួតប្រដាល់សកលអាជីពស្របតាមច្បាប់របស់របស់ក្រុមប្រឹក្សាប្រដាល់សកលពិភពលោក នៅថ្ងៃទី២៩ ខែកុម្ភៈ ឆ្នាំ២០២៤ នៅពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឲ្យដឹងពីសហព័ន្ធកីឡាប្រដាល់សកលកម្ពុជាថា ការប្រកួតនេះមាន៨គូដែលសុទ្ធតែកីឡាករ កីឡាការិនីកម្ពុជាប្រកួតគ្នាឲ្យស្របតាមបទបញ្ជាការប្រកួត និងបទប្បញ្ញត្តិ របស់ក្រុមប្រឹក្សាប្រដាល់ពិភពលោក។

គោលបំណងសំខាន់នៃការៀបចំនេះដើម្បីបំពេញលក្ខន្តិកៈសម្រាប់ចូលជាសមាជិកក្នុងស្ថាប័នប្រដាល់សកល World Boxing Council (WBC)។ ព្រឹត្តិការណ៍ប្រកួតនេះនឹងមានថ្នាក់ដឹកនាំរបស់ WBC មកពីប្រទេសជប៉ុនចូលរួមដើម្បី ពិនិត្យ និងវាយតម្លៃដោយផ្ទាល់។

ការចូលជាសមាជិកក្រុមប្រឹក្សាប្រដាល់សកលពិភពលោកនឹងផ្តល់ឲ្យកម្ពុជាមានសិទ្ធិចូលរួមប្រកួតប្រដាល់សកលអាជីពលំដាប់ពិភពលោក និងស្វែងយល់កាន់តែច្បាស់ពីច្បាប់ បទប្បញ្ញត្តិ និងគោលការណ៍អភិវឌ្ឍកីឡាប្រដាល់កម្រិតពិភពលោក។ ជាពិសេសនៅពេលកម្ពុជាបានក្លាយជាសមាជិកពេញ នឹងមានទង់ជាតិកម្ពុជានៅលើខ្សែក្រវាត់ WBC។

សូមបញ្ជាក់ថា ការប្រដាល់សកលអាជីពមិនពាក់អាវ ឬមួកការពារក្បាលឡើយ ហើយមានច្បាប់ប្រកួតពី៤ទឹក ៦ទឹក ៨ទឹក ១២ទឹក។ កាលពីសម័យមុន ការប្រកួតប្រដាល់សកលអាជីពមានរហូតដល់១៥ទឹក។ សម្រាប់ការប្រកួតប្រដាល់សកលនៅក្នុងកីឡាស៊ីហ្គេម កីឡាទ្វីបអាស៊ី ឬកីឡាអូឡាំពិក ដែលពាក់អាវ និងមួកការពារគឺជាប្រដាល់សកលស្ម័គ្រចិត្តដោយប្រើពេលតែ៣ទឹកប៉ុណ្ណោះ៕