Son សំណូមពរឲ្យអ្នកគាំទ្រកូរ៉េខាងត្បូងឈប់សើចចំអកគ្រូបង្វឹកថ្មី

គ្រូបង្វឹកថ្មីក្រុមបាល់ទាត់​ជម្រើសជាតិកូរ៉េខាងត្បូង លោក Hong Myung-bo ត្រូវបានអ្នកគាំទ្រសើចចំអកមុនពេ​ល និងអំឡុងពេលប្រកួត ដោយសារពួកគេមិនពេញចិត្តក្នុងការជ្រើសរើស​លោកធ្វើជាគ្រូបង្វឹកក្រុមនាំក្រុម។

កីឡាករ Son Heung-min បានដាស់តឿនអ្នកគាំទ្រកូរ៉េខាងត្បូងឲ្យឈប់កំណត់គោលដៅក្នុងការចង់បានគ្រូបង្វឹកថ្មីរបស់ពួកគេបន្ដទៀត ខណៈក្រុមជម្រើសជាតិកូរ៉េខាងត្បូង បានផ្លាស់ប្ដូរគ្រូបង្វឹក៤រូបហើយ ក្នុងរយៈពេលជិត១ឆ្នាំនេះ។
បន្ទាប់ពីលោក Jürgen Klinsmann សញ្ជាតិអាឡឺម៉ង់ បានចេញចាកពីតំណែង​កាលពីថ្ងៃទី១៦ ខែកុម្ភៈ ឆ្នាំ២០២៤ លោក Hong Myung-bo ជាគ្រូបង្វឹកទី៤ ចូលកាន់តំណែងក្នុងការដឹកនាំក្រុមមួយនេះ។

កីឡាករ Son Heung-min បាននិយាយថា ៖«ខ្ញុំមិនអាចនិយាយបានទេសម្រាប់អ្នកគាំទ្រទាំងនោះ។ ខ្ញុំគិតថា ពួកគេមានគ្រូបង្វឹកដែលពួកគេចង់បាន។ ប៉ុន្តែយើងមិនអាចផ្លាស់ប្តូរការសម្រេចចិត្តនេះបានទេ។ គ្រូបង្វឹកគឺបានមកដល់ទីនេះហើយ។ ក្នុងនាមជាប្រធានក្រុម​ ខ្ញុំសូម​ឲ្យអ្នកគាំទ្ររបស់យើងស្រឡាញ់ និងបន្ដគាំទ្រពួកគេ»។

ក្នុងការប្រកួតវគ្គជម្រុះជុំទី៣ ពានរង្វាន់ World Cup ក្នុងតំបន់អាសុី ក្រុមកូរ៉េខាងត្បូង ស្ថិតក្នុងពូល B ជាមួយក្រុមអុីរ៉ាក់, ហ្សកដានី, គុយវ៉ែត, ប៉ាឡេស្ទីន និង អូម៉ង់។ ក្នុងការប្រកួតទី១ ក្នុងវគ្គសន្សំពិន្ទុ លោក Hong Myung-bo បានធ្វើឲ្យអ្នកគាំទ្រកូរ៉េខាងត្បូង កាន់តែមិនពេញចិត្តរូបលោក ក្រោយបញ្ចប់ត្រឹមលទ្ធផលស្មើគ្នា ០-០ ជាមួយក្រុមប៉ាឡេស្ទីន។

ការវិលមកដឹកនាំក្រុមជម្រើសជាតិកូរ៉េខាងត្បូងជាថ្មីរបស់លោក Hong Myung-bo ស្ដិតក្នុងភាពដ៏តានតឹងគ្រូបង្វឹកនៅតែបន្ដអត់ធ្មត់ដឹកនាំក្រុមក្នុងការប្រកួតបន្ទាប់ ត្រូវជួបជាមួយក្រុមអូម៉ង់ នៅថ្ងៃទី១០ ខែកញ្ញា​នេះ៕

ប្រែសម្រួ​ល៖ ផា រតនា