Rashford ប្រាប់​ថា ខ្លួន​នឹង​ចាកចេញពី Man Utd ដោយកិត្តិយស

អនាគតរបស់កីឡាករ Marcus Rashford ជាមួយក្លិប Manchester United កាន់តែខិតជិតដល់​ទី​បញ្ចប់​ហើយ​ ក្រោយរូបគេមិនមានឈ្មោះក្នុងបញ្ជីកីឡាកេ​ពេលប្រកួតជាមួយ Manchester City កាលពីថ្ងៃអាទិត្យ។

ខ្សែប្រយុទ្ធ Marcus Rashford បានសារភាពថា រូប​គេ​បានត្រៀមខ្លួនរួចជាស្រេចសម្រាប់ការប្រកួតប្រជែងថ្មី។ រឿងនេះត្រូវបានគេរាយការណ៍ថា ក្លិប Manchester United បានត្រៀមខ្លួនរួចរាល់ ក្នុងការអនុញ្ញាតឲ្យ Rashford ចាកចេញពីក្លិប នៅពេលទីផ្សារដោះដូរកីឡាករខែមករាបើក បន្ទាប់ពីរូបគេបាន​នៅ​ជា​មួយ​ក្លិបតាំងពីអាយុ៧ឆ្នាំ។

កីឡាករ Marcus Rashford បាននិយាយថា ៖«ខ្ញុំ​បាន​ត្រៀមខ្លួន​ហើយ​ដើម្បី​ប្រជែងថ្មី។ នៅពេលខ្ញុំចាកចេញ វានឹងមិនមានអារម្មណ៍ពិបាកទេ។ អ្នកនឹងមិនមានការនិយាយអវិជ្ជមានណាមួយពីខ្ញុំជាមួយ Manchester United នោះទេ»។ នេះជាអ្វីដែលកីឡាករ​បាននិយាយ​ពេលទស្សនកិច្ចទៅកាន់សាលាចាស់របស់​ខ្លួនដើម្បី​ចែក​អំណោយបុណ្យណូអែល។

Rashford បានបន្ថែមថា ៖«ខ្ញុំដឹងថា ស្ថានការណ៍អាក្រក់រួចទៅហើយ ដូច្នេះ​ខ្ញុំមិនធ្វើឲ្យវាកាន់តែអាក្រក់​ទៀតទេ។ ខ្ញុំបានឃើញ​ពី​របៀប​កីឡាករខ្លះ​ បានចាកចេញកន្លង​មក​គឺ​​បាន​និយាយមិនល្អពី​ក្លិប។ ខ្ញុំមិនចង់ក្លាយជាមនុស្សបែបនោះទេ។ នៅពេលខ្ញុំចាកចេញ ខ្ញុំនឹងធ្វើសេចក្តីថ្លែងការណ៍មួយ ហើយវានឹងចេញមកពីខ្ញុំផ្ទាល់»។

Rashford បានស៊ុតបញ្ចូលទីបាន៣០គ្រាប់​ឲ្យ​ក្លិប Man United ក្នុងរដូវកាលឆ្នាំ ២០២២-២៣ ប៉ុន្តែរូបគេបានធ្លាក់ទម្រង់លេងយ៉ាងខ្លាំងក្នុង១៨ខែចុងក្រោយ៕

ប្រែសម្រួល៖ ផា រតនា