Neville ចុចឈ្មោះកីឡាករ ៥ នាក់ ថាមិនល្អគ្រប់គ្រាន់សម្រាប់ Man United ក្រោយស្មើ Man City

វីរបុរសរបស់ក្រុមបិសាចក្រហម Manchester United លោក Gary Neville បានទទូចឱ្យអតីតក្លិបរបស់ខ្លួនចុះកុងត្រាយកកីឡាករថ្មី ៥ នាក់ មកបំពេញកន្លែងកីឡាករ ដែលលោកយល់ឃើញ ពុំទាន់ល្អគ្រប់គ្រាន់សម្រាប់ក្រុម។

លោក Neville បានលើកឡើងបែបនេះ បន្ទាប់ពី Man United បញ្ចប់ការប្រកួត ៩០ នាទីពេញស្មើគ្នា ០-០ ទល់នឹង Manchester City នៅទឹកដី Old Trafford ក្នុងការប្រកួតក្របខណ្ឌ Premier League កាលពីថ្ងៃ អាទិត្យ ទី ៦ យប់មិញ។

ទាក់ទងនឹងរឿងខាងលើ លោក Neville បានមានប្រសាសន៍ប្រាប់ Sky Sports ក្រោយបញ្ចប់ការប្រកួតយ៉ាងដូច្នេះថា៖ «ពួកគេមកទីនេះទាំងអស់គ្នា ជាមួយគោលបំណងការលេងក្នុងកម្រិតខ្ពស់ កម្លាំងដ៏ខ្លាំងនៅក្នុងបាល់ទាត់ ប៉ុន្តែនៅទីបញ្ចប់ វាបែជាធ្លាក់ចុះនៅក្នុងការប្រកួតធំទៅវិញ។ ខ្ញុំយល់ហើយ ថា ហេតុអ្វីបានជា Ruben Amorim ធ្វើវាអ៊ីចឹងនៅថ្ងៃនេះ ជាមួយកីឡាករ ដែលគាត់មានស្រាប់ ព្រោះថា គាត់គឺមិនមានកីឡាករ ដែលអាចសម្របតាមការចង់បានរបស់លោកឡើយ។ ពួកគេត្រូវការកីឡាករថ្មី ៥ នាក់…។ កីឡាករជួរមុខទាំង ៣ គឺមិនទាន់ល្អគ្រប់គ្រាន់ ហើយចំណែកខ្សែការពារស្លាបទាំង ២ ក៏មិនទាន់ល្អគ្រប់គ្រាន់…»។

សូមបញ្ជាក់ថា នៅក្នុងការប្រកួតទល់នឹង Man City យប់មិញ លោក Amorim បានរៀបចំប្រព័ន្ធលេង ៣-៤-៣ ខណៈខ្សែប្រយុទ្ធ ៣ ខាងលើ មាន Rasmus Hojlund, Bruno Fernandes និង Alejandro Garnacho។ រីឯខ្សែការពារស្លាបស្តាំ គឺ Diogo Dalot និងខ្សែការពារស្លាបឆ្វេង គឺ Patrick Dorgu៕

ប្រែសម្រួលអត្ថបទ៖ សេម កុសល
ប្រភព៖ Sportbible