កីឡា

តឹងរឹងបន្តិចហើយ! រៀនអត់ទាន់ដល់បាក់ឌុបគ្រូកីឡាកាយសម្ព័ន្ធមិនអនុញ្ញាតឲ្យប្រើទូរសព្ទដាច់ខាត

បានផុស

២៤ នាទីutes មុន

នៅ

ថ្ងៃអង្គារ ១០ មិថុនា ២០២៥

ដោយ

អគ្គលេខាធិការសហព័ន្ធ និងជាគ្រូបង្វឹកជើងចាស់លោក ណយ ផាណា កីឡាករ កីឡាការិនី មិនថាជម្រើសជាតិ ឬថ្នាលនោះទេអ្នកដែលកំពុងរៀនក្រោមបាក់ឌុបចុះក្រោមមិនអនុញ្ញាតឲ្យប្រើប្រាស់ទូរសព្ទដាច់ខាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណយ ផាណា កំពុងបង្ហាត់សិស្ស

លោក ណយ ផាណា បានឲ្យដឹងថា នៅកន្លែងសហព័ន្ធកីឡាកាយសម្ព័ន្ធនេះជាទូទៅកីឡាករ កីឡាការិនី ដែលសិក្សាមិនទាន់ដល់បាក់ឌុបគឺមិនអនុញ្ញាតឲ្យកាន់ទូរសព្ធ ឬប្រើប្រាស់ទូរសព្ទឡើយ។ ចំពោះអ្នកដែលសិក្សាថ្នាក់ទី១១-១២ គឺអាចប្រើប្រាស់បន្តិចបន្តួចលើការទំនាក់ទងក្នុងក្រុមការសិក្សាតែប៉ុណ្ណោះ នៅពេលរៀនរួចរាល់ត្រូវប្រគល់ឲ្យលោកទុកដាក់វិញ។

លោក ណយ ផាណា កំពុងបង្ហាត់សិស្ស

ប្រសិនបើនរណាមានការចាំបាច់ ឬក្រុមគ្រួសារចង់ទាក់ទងគឺអាចហៅមកលោកផ្ទាល់ក៏ដូចជាគ្រូជំនួយដែលកំពុងនៅមើលថែពួកគេបាន។ ចំពោះច្បាប់ទម្លាប់នេះលោកបានអនុវត្តន៍ជាយូរឆ្នាំមកហើយមើលទៅហាក់តឹងតែងបន្តិច ប៉ុន្តែពិនិត្យឲ្យដល់គឺមានគុណផលល្អសម្រាប់ពួកគេ។

លោក ណយ ផាណា កំពុងបង្ហាត់សិស្ស

ការប្រើប្រាស់ទូរសព្ទនេះគឺមានផលប៉ះពាល់ខ្លាំងដល់កីឡាករ កីឡាការិនី ដែលកំពុងហ្វឹកហាត់ ព្រោះបើមិនតឹងរឹងទេប្រសិនបើពួកគេប្រើសេរីហើយយប់ឡើងចុចដល់ម៉ោង ១២ ឬ ១យប់ទើបសម្រាកមានកម្លាំងឯណាហ្វឹកហាត់។ មួយវិញទៀតប្រសិនបើពួកគេមិនចូលរៀនឆ្លៀតចេញមកចុចទូរសព្ទ ឬលេងហ្គេម មើលរឿងផ្ដេសផ្ដាស ធ្វើអ្វីដែលមិនសមរម្យគឺវាមានបញ្ហាច្រើនណាស់ប្រសិនបើមិនគ្រប់គ្រងលើការប្រើប្រាស់នេះឲ្យបានល្អនោះទេ។

លោក ណយ ផាណា កំពុងបង្ហាត់សិស្ស

បញ្ជាក់ដែរថា សហព័ន្ធកីឡាកាយសម្ព័ន្ធដែលដឹកនាំដោយអគ្គលេខាធិការលោក ណយ ផាណា គឺប្រមូលផ្ដុំកីឡាករ កីឡាការិនីជាប្រចាំនៅក្នុងសាលរបស់សហព័ន្ធនៃពហុកីឡដ្ឋានជាតិ។ លោក រួមនិងគ្រូជំនួយជាអ្នកនៅជាប់ជាមួយពួកគេតែម្ដង ការហូបចុក ស្នាក់នៅ ហ្វឹកហាត់ ត្រូវបានតាមដានជាប់ជានិច្ច។ កីឡាកាយសម្ព័ន្ធជាប្រភេទកីឡាអូឡាំពិកហ្គេម និងជាកីឡាដែលពិបាក និងត្រូវការពេលវេលាយូរឆ្នាំក្នុងការបណ្ដុះធនធានឲ្យមានសមត្ថភាពប្រកួត៕