លន បញ្ញា ចេញ​ក្រៅ​ប្រទេស​លើក​នេះ ប៉ះ Daniel ជា​ជើង​ខ្លាំង​ប្រចាំ​ប្រទេស នូវែលសេឡង់

កីឡាករគុនខ្មែរឆ្នើមៗចំនួន ៥ នាក់ នឹងត្រូវឆ្លងទ្វីបចេញទៅប្រកួតនៅប្រទេស នូវែលសេឡង់ ដោយត្រូវជួបជាមួយម្ចាស់ផ្ទះ ៥ ទល់ ៥ នាថ្ងៃ សៅរិ៍ ទី ២១ ខែ មិថុនា ឆ្នាំ ២០២៥ ខាងមុខនេះ។

កីឡាកររបស់កម្ពុជា ដែលមានឈ្មោះចេញទៅប្រកួតនៅទីនោះរួមមាន លន បញ្ញា, ឡៅ ចន្ទ្រា, ធន់ វណ្ណា, ថៃ រ៉េត និង ធន់ ចាន់តាក់។

ចំណែកគូប្រកួតនីមួយៗវិញក៏បានប្រកាសជាផ្លូវការហើយដែរ ក្នុងនោះ នាគចម្បាំង លន បញ្ញា ត្រូវជួបជាមួយកីឡាករ Daniel Ruwanga, ឡៅ ចន្ទ្រា ត្រូវជួប Suran Juanmiry, ធន់ វណ្ណា ត្រូវជួប Dominic Reed, ថៃ រ៉េត ត្រូវជួប Arshia Ebadi និងចុងក្រោយ ធន់ ចាន់តាក់ ត្រូវជួបជាមួយកីឡាករ Issac Tshikula។

ចំពោះគូទាំង ៥ ខាងលើ រាប់បានសុទ្ធតែជាកីឡាករខ្លាំងៗ ជាពិសេសគូរបស់បញ្ញា កីឡាករ Daniel Ruwanga និងឡៅ ចន្ទ្រា កីឡាករ Suran Juanmiry ប៉ុន្តែមួយគូ ដែលចាប់អារម្មណ៍បំផុត គឺជំនួបរវាងកូនសិស្សលោកគ្រូ ធន់ សុភា កីឡាករ លន បញ្ញា ទល់នឹងកីឡាករម្ចាស់ផ្ទះ Daniel Ruwanga។

Daniel ត្រូវបានគេចាត់ទុកជាកីឡាករលំដាប់ម្នាក់ប្រចាំសង្វៀន King in the Ring ក្នុងប្រទេស នូវែលសេឡង់។ កាលពីថ្ងៃទី ២២ ខែ មីនា ឆ្នាំ ២០២៥ កន្លងទៅ រូបគេបានចូលប្រកួតដណ្តើមខ្សែក្រវាត់ 8 Men King in the Ring។ រូប​គេ​ធ្វើបានយ៉ាងល្អក្នុង ២ ប្រកួតដំបូង ប៉ុន្តែនៅក្នុងការប្រកួតចុងក្រោយ ដែលជាការប្រកួតវគ្គផ្តាច់ព្រ័ត្ររូបគេបានចាញ់កីឡាករ Suran Juanmiry ដោយពិន្ទុ ដែលជាដៃគូឡៅ ចន្ទ្រា។

ងាកមកមើលអំពីស្ថិតិប្រកួតវិញ កីឡាករសញ្ជាតិ នូវែលសេឡង់ រូបនេះធ្លាប់ប្រកួតអាជីពបានចំនួន ២០ ដង ក្នុងនោះឈ្នះ ១៤ ដង (ផ្តួលដៃគូសន្លប់ ២ ដង) និងចាញ់ ៦ដង។ Daniel មានជំនាញប្រកួតទាំងក្បាច់គុនប្រដាល់សេរី និង Kick Boxing ហើយចំណុចពិសេសរបស់គេ គឺជាកីឡាករស្វិតធន់ ចូលចិត្តបុក ដៃត្រង់ និងពូកែទាត់ ព្រម​ទាំង​ជង្គង់ផងដែរ។

គួរបញ្ជាក់ថា កម្មវិធីនេះ គឺជាការរៀបចំឡើងដោយការចាប់ដៃគ្នារវាងខាងកម្ពុជា និងនូវែលសេឡង់ ហើយក៏នឹងមានផ្សាយបន្តផ្ទាល់ផងដែរ នៅលើស្ថានីយទូរទស្សន៍ BTV News នាថ្ងៃទី ២១ ខែ មិថុនា ឆ្នាំ ២០២៥ នេះ៕

អត្ថបទ៖ សេម កុសល