Man United កាន់តែកៀកផ្ទេរយកបានកីឡាករគោលដៅម្នាក់ក្នុងតម្លៃជាង ៨០ លានដុល្លារ

ក្លិបបិសាចក្រហម Manchester United កាន់តែកៀកនឹងចុះកិច្ចសន្យានាំ​យកបានខ្សែប្រយុទ្ធ Bryan Mbeumo ពី Brentford បន្ទាប់ពីពួកគេដាក់សំណើលើកទី ២ ជាផ្លូវការ ក្នុងតម្លៃរហូតដល់ទៅជិត ៨២ លានដុល្លារអាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយដោយអ្នកកាសែត អ៉ីតាលី លោក Fabrizio Romano បានឱ្យដឹងថា Man United បានបញ្ជូនសំណើជាផ្លូវការទៅក្លិប Brentford ដើម្បីផ្ទេរយក Mbeumo។ ក្លិបបិសាចក្រហមបានបញ្ជូនសំណើនេះកាលពីចុងសប្តាហ៍កន្លងទៅ ក្នុងទំហំទឹកប្រាក់ជិត ៨២ លានដុល្លារអាមេរិក ខណៈបច្ចុប្បន្នភាគីក្លិប និងក្លិបកំពុងតែបន្តការចរចា​គ្នា។ ការហ៊ានឱ្យដល់តម្លៃនេះ ធ្វើឱ្យក្លិបបិសាចក្រហម កំពុងតែខិតជិតនឹងចុះកិច្ចសន្យាយកបានខ្សែប្រយុទ្ធសញ្ជាតិ កាមេរូន វ័យ ២៥ ឆ្នាំហើយ។

មែនទែនទៅ Man United ធ្លាប់បញ្ជូនសំណើ ដើម្បីចុះកិច្ចសន្យាយក Mbeumo ពី Brentford រួចម្តងហើយ ដោយពេលនោះពួកគេបានដេញថ្លៃជាទឹកប្រាក់ចំនួន ៧៥ លានដុល្លារអាមេរិក ប៉ុន្តែភ្លាមៗនោះ សំណើនេះត្រូវបានបដិសេធដោយក្រុមរបស់ភាគីកីឡាករ។

ទោះបីយ៉ាងណា Man United នៅតែ​មិន​បោះបង់។ ពួកគេនៅតែបន្តផែនការរបស់ខ្លួនតាមចុះកិច្ចសន្យាយក Mbeumo ជាថ្មីម្តងទៀត ហើយការដាក់សំណើលើកទី ២ នេះ ពួកគេហ៊ានឱ្យតម្លៃផ្ទេរថ្លៃជាងមុន។ មូលហេតុដែល ក្លិបបិសាចក្រហមចង់បានខ្សែប្រយុទ្ធវ័យ ២៥ ឆ្នាំរូបនេះខ្លាំងបែបនេះ ដោយសាររូបគេជាកីឡាករម្នាក់ ដែលក្លិបរំពឹងថា នឹងក្លាយជាកីឡាករដ៏ត្រឹមត្រូវ ដែលមានសមត្ថភាពអាចលេងបានតាមប្រព័ន្ធរបស់គ្រូបង្វឹកលោក Ruben Amorim។

គួរបញ្ជាក់ថា Mbeumo គឺនៅសល់កិច្ចសន្យាជាមួយ Brentford រយៈពេល ១ ឆ្នាំទៀត ពោលគឺដល់ខែ មិថុនា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ Fabrizio Romano