សឿត បារាំង សម្រេចចិត្តចាកចេញពី ភ្នំពេញក្រោន មកព្រះខ័នរាជស្វាយរៀង ដោយសារកត្តាធំ ២

ខ្សែការពារស្លាបឆ្វេង សឿត បារាំង បានទម្លាយពីហេតុផលធំ ២ ដែលខ្លួនសម្រេចចិត្តចាកចេញពីទ្រនំចាស់ ភ្នំពេញក្រោន ផ្លាស់មកកាន់ក្លិបព្រះខ័នរាជស្វាយរៀង ក្នុងរដូវកាលនេះ។

ថ្លែងនៅក្នុងកិច្ចសម្ភាសជាមួយសារព័ត៌មាន «កម្ពុជាថ្មី» អតីតខ្សែការពារស្លាបឆ្វេងរបស់ ភ្នំពេញក្រោន បានលើកឡើងថា៖ «ខ្ញុំមានអារម្មណ៍រីករាយ ដែលបានមកចូលរួមជាមួយព្រះខ័នរាជស្វាយរៀង។ យើងដឹងហើយ ព្រះខ័នរាជស្វាយរៀង ជាក្រុមមួយដ៏ធំនៅក្នុងស្រុករបស់យើង។ ទាំងការរៀបចំ និងកីឡាករ គឺសុទ្ធតែល្អៗ។ ម្យ៉ាង ព្រះខ័នរាជស្វាយរៀង គឺត្រៀមខ្លួនការប្រកួតច្រើន មិនថាពានក្នុងស្រុក និងក្រៅស្រុក»។

សឿត បារាំង បានបន្តទៀតថា ៖«ខ្ញុំមកទីនេះ ដោយសារចង់ស្វែងរកបទពិសោធថ្មី ក៏ដូចជាការប្រកួតប្រជែងថ្មី។ អ៊ីចឹង នៅពេលខ្ញុំសម្រេចចិត្តមកទីនេះ ខ្ញុំគឺមានការប្តេជ្ញាចិត្ត ចំពោះការប្រកួតប្រជែង ដើម្បីប្រជែងកៅអី ១១ នាក់ដំបូង ក៏ដូចជាស្វែងរកអ្វីដែលថ្មី និងសមិទ្ធផលថ្មីៗបន្ថែមទៀតសម្រាប់ខ្លួនខ្ញុំផ្ទាល់ និងក្លិប»។

ខ្សែការពារស្លាបឆ្វេងវ័យ ២៥ ឆ្នាំបានបង្ហាញអារម្មណ៍សប្បាយរីករាយ ដែលបានផ្លាស់មកចូលរួមជាមួយក្រុមព្រះខ័នរាជស្វាយរៀង នៅរដូវកាលនេះ។ រូបគេបានលើកឡើងផងដែរ ចំពោះមូលហេតុដែលគេសម្រេចចិត្តចាកចេញពីទ្រនំចាស់ ភ្នំពេញក្រោន ផ្លាស់មកកាន់ ព្រះខ័នរាជស្វាយរៀង ដោយសារ គេចង់ស្វែងរកបទពិសោធថ្មី និងការប្រកួតប្រជែងថ្មីសម្រាប់​អាជីពរបស់ខ្លួន។

ជាមួយគ្នានេះ បារាំង បានប្តេជ្ញាចិត្តយ៉ាងមុតមាំ ថាគេនឹងខំប្រឹងឱ្យអស់ពីសមត្ថភាព ដើម្បីប្រជែងយកកៅអី ១១ នាក់ដំបូង។ ហើយនឹងប្រឹងប្រែងយ៉ាងណា ដើម្បីជួយក្លិបឱ្យឈ្នះពានផ្សេងៗសម្រាប់ការប្រកួតប្រជែងនៅរដូវកាលនេះ។

គួរបញ្ជាក់ថា សឿត បារាំង មុនផ្លាស់មកកាន់ក្លិបព្រះខ័នរាជស្វាយរៀង រូបគេគឺជាកីឡាករម្នាក់ ដែលត្រូវបានបណ្តុះបណ្តាលដោយក្លិប ភ្នំពេញក្រោន តាំងពីក្រុមយុវជន រហូតមកដល់ក្រុមធំ។

អត្ថបទ៖ កុសល