ញាក់សាច់! Chelsea ឈ្នះពាន Club World Cup ក្រសោបបានប្រាក់រង្វាន់យ៉ាងច្រើន

ក្រុមតោខៀវ Chelsea ទទួលបានប្រាក់រង្វាន់យ៉ាងច្រើនមហាសាល បន្ទាប់ពីឈ្នះពាន FIFA Club World Cup ២០២៥។

ការប្រកួតពាន Club World Cup បានបញ្ចប់ជាស្ថាពរហើយ ក្នុងនោះក្រុម Chelsea ជាអ្នកក្លាយជាម្ចាស់ជើងឯក បន្ទាប់ពីយកឈ្នះលើក្រុម Paris Saint-Germain នៅវគ្គផ្តាច់ព្រ័ត្រក្នុងលទ្ធផលយ៉ាងភ្ញាក់ផ្អើល ៣-០ កាលពីយប់រំលងអាធ្រាត្រថ្ងៃ អាទិត្យ ឈានចូលថ្ងៃ ចន្ទ ទី ១៤ ខែ កក្កដា ឆ្នាំ ២០២៥។

តាមរយៈកំណែទម្រង់ថ្មីនៃពាន Club World Cup ឆ្នាំ ២០២៥ នេះ បានធ្វើឱ្យ Chelsea ទទួលបាននូវប្រាក់រង្វាន់យ៉ាងច្រើនពីការឈ្នះជើងឯកពាននេះ។ យោងតាមការចុះផ្សាយដោយ as ដែលដកស្រង់បន្តចេញពី Sportico បានឱ្យដឹងថា ក្រុមរបស់គ្រូបង្វឹកលោក Enzo Maresca គឺទទួលបានប្រាក់រង្វាន់រហូតដល់ ១១៦ លានដុល្លារអាមេរិក។

ប្រាក់រង្វាន់នេះ ត្រូវបានគេគិតតាំងពីការប្រកួតវគ្គក្នុងពូល រហូតដល់ពេលក្លាយជាជើងឯក។ ក្នុងនោះរាប់ការប្រកួតតាំងពីវគ្គក្នុងពូល ដល់វគ្គពាក់កណ្តាលផ្តាច់ព្រ័ត្រ គឺ Chelsea ទទួលបាន ៧៦ លានដុល្លារអាមេរិក។ ចំណែកការក្លាយជាជើងឯកពាន Club World Cup នេះ គឺពួកគេទទួលបានប្រាក់រង្វាន់ចំនួន ៤០ លានដុល្លារអាមេរិក។ ដូច្នេះសរុបប្រាក់រង្វាន់ចុងក្រោយ គឺពួកគេទទួលបាន ១១៦ លានដុល្លារអាមេរិក៕

ប្រែសម្រួល៖ សេម កុសល
ប្រភព៖ as