ញាក់សាច់! ក្លិប Liverpool គ្រោងចាយលុយ ១៦០ លានដុល្លារ ទិញយកជើងស៊ុត​ម្នាក់ ប្រចាំលីគ​អង់គ្លេស

ក្លិបហង្សក្រហម Liverpool គ្រោងចាយលុយ​ធំជាថ្មីនៅរដូវកាល ២០២៥-២០២៦ នេះ ដើម្បីចុះកិច្ចសន្យាយកខ្សែប្រយុទ្ធរបស់ក្រុម Newcastle United កីឡាករ Alexander Isak។

យោងតាមការចុះផ្សាយដោយអ្នកកាសែត អ៉ីតាលី លោក Fabrizio Romano បានឱ្យដឹងថា ក្លិប Liverpool បានរៀបចំកញ្ចប់ទឹកប្រាក់ចំនួន ១៦០ លានដុល្លារអាមេរិក ដើម្បីដេញថ្លៃយក​កីឡាករ Isak នៅរដូវក្តៅនេះ។

ទោះបីជាយ៉ាងណា គិតត្រឹមពេលនេះ Isak មិនទាន់មានតម្រុយជាក់លាក់ណាមួយ ដែលបញ្ជាក់ថា រូបគេអាចនឹងផ្លាស់ទៅកាន់ Liverpool នៅឡើយ ដោយសារ​រូបគេបានទុកអាទិភាពនៃការចាកចេញរបស់ខ្លួន ស្ថិតនៅលើ​ក្លិប​ Newcastle ជា​អ្នក​សម្រេច។

គួរឱ្យដឹងថា Liverpool មានបំណងចង់បាន Isak នៅរដូវកាលនេះ ដោយសារ​ពួកគេ ចង់យកខ្សែប្រយុទ្ធសញ្ជាតិ ស៊ុយអែត រូបនេះទៅជំនួសកន្លែងរបស់ Darwin Nunez ដែលក្លិបនឹងអនុញ្ញាតឱ្យចាកចេញនៅរដូវក្តៅនេះ៕

ប្រែសម្រួល៖ សេម កុសល
ប្រភព៖ Fabrizio Romano