មកដឹងមូលហេតុបាត់ចំនួន Follower ក្នុង Facebook កំពុងផ្អើលពិភព​លោក

Follower នៅក្នុងបណ្តាញសង្គម Facebook នៅជុំវិញពិភពលោកកំពុងតែមានការធ្លាក់ចុះជាច្រើន មិនថាតែនៅលើ Page សារព័ត៌មានធំៗ ឬ Page តារា បុគ្គលល្បីៗ នោះឡើយ ។

ការបាត់បង់ចំនួន Follower នេះ ក្រុមហ៊ុន Meta ចេញបញ្ជាក់ថា គឺដោយសារតែក្រុមហ៊ុនធ្វើការលុបចោលគណនី Facebook ក្លែងក្លាយ (Fake Account) ជាច្រើន ដែលបង្កើតឡើងក្នុងចេតនាមិនសមរម្យណាមួយ ប៉ះពាល់ដល់គោលការណ៍របស់ក្រុមហ៊ុន ហើយជារៀងរាល់ថ្ងៃ បច្ចេកវិទ្យាប្រព័ន្ធការពារ Facebook បានធ្វើការលុបចោលគណនីទាំងនោះខ្ទង់លានគណនី ។

ចន្លោះខែមេសា ដល់ខែមិថុនា ឆ្នាំ ២០២២ នេះ  បច្ចេកវិទ្យាប្រព័ន្ធការពារ Facebook ចាប់បានគណនី ជាង ១.៤ ពាន់លានគណនី ដែលសង្ស័យថា ជាគណនី Bot (កម្មវិធីស្វ័យប្រវត្តិ) ហើយបានធ្វើការលុបចោលគណនីក្លែងក្លាយប្រមាណជា ១.៦ ពាន់លានគណនីផងដែរ ។

ជាមួយគ្នានេះ ផេកសារព័ត៌មានធំៗដូចជា New York Times, Washington Post, Huffington Post, The Hill, USA Today, New York Post និង Newsweek គឺសុទ្ធតែបាត់បង់ចំនួន Follower អស់ជាច្រើនម៉ឺនគណនី ពោលសារព័ត៌មានទាំង ៧ នេះធ្លាក់ចំនួន ៣៨,៨១២ Like កាលពីថ្ងៃចន្ទ និង ២៩,៦៩២ Like កាលពីថ្ងៃអង្គារ ។

សូមបញ្ជាក់ថា ចាប់តាំងពីខែមេសា ដល់ខែមិថុនា ឆ្នាំ ២០២២ នេះ ក្រុមហ៊ុន Meta ចាប់បានគណនីក្លែងក្លាយ ប្រមាណជា ៥ ភាគរយដែលបានប្រើប្រាស់នៅជុំវិញពិភពលោក ៕

ប្រែសម្រួលដោយ ៖ នាង រតនៈ

ប្រភព ៖ Newsweek

ចុចអាន ៖ ទីបំផុត អាចម៍ផ្កាយដែលយានអង្គការ ណាសា ហោះបុក បង្វែរផ្លូវក្នុងលំហ​ហើយ