ចរាចរណ៍

រថយន្តបែនដឹកដី បើកគេចរថយន្ត ១ គ្រឿង ជ្រុលបុកកុងតឺន័របត់ឆ្លងផ្លូវ របួសធ្ងន់-ស្រាល ៣ នាក់ នៅខណ្ឌដង្កោ

បានផុស

៧ ខែ មុន

នៅ

ថ្ងៃអាទិត្យ ២១ ធ្នូ ២០២៥

ដោយ

រថយន្តបែនដឹកដី បើកគេចរថយន្ត ១ គ្រឿង ជ្រុលបុករថយន្តកុងតឺន័របត់ឆ្លងផ្លូវ បណ្ដាលឲ្យរេចង្កូតធ្លាក់ប្រឡាយគាបជាប់តៃកុងក្នុងរថយន្ត រងរបួសធ្ងន់-ស្រាល ៣ នាក់ នៅខណ្ឌដង្កោ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងកាលពីវេលាម៉ោង ៩ ព្រឹក ថ្ងៃទី ២១ ខែធ្នូ ឆ្នាំ ២០២៥ ជិតស្តុបគងណយ ផ្លូវ ១០៤ សង្កាត់គងណយ ខណ្ឌដង្កោ។

តាមប្រភពព័ត៌មានបានឲ្យដឹងថា មុនពេលកើតហេតុ គេបានឃើញបុរសម្នាក់ បើករថយន្តប្រភេទ សណ្ដោងរ៉ឺម៉កធុនធំ ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 2C 2056 ធ្វើដំណើរតាមបណ្ដោយផ្លូវលេខ ១០៤ ទិសដៅពីលិចទៅកើត លុះមកដល់ចំណុចកើតហេតុ បានបត់ឆ្វេងឆ្លងផ្លូវចូលទៅផ្លូវលំ។ គាប់ជួនពេលនោះ ស្រាប់តែមានបុរស ៣ នាក់ រួមទាំងអ្នកបើកបរ បានបើករថយន្តប្រភេទបែនដឹកដី ក្បាលពណ៌ស ចង្កូតស្តាំ ធ្វើដំណើរតាមបណ្ដោយផ្លូវលេខ ១០៤ ទិសដៅបញ្ច្រាសគ្នា ពីកើតទៅលិច ដែលបានគេចរថយន្ត ១ គ្រឿង មិនស្គាល់ម៉ាក ក៏ជ្រុលទៅបុកនឹងកន្ទុយរ៉ឺម៉ករថយន្តសណ្តោងបត់ឆ្លងផ្លូវ បណ្ដាលឲ្យរថយន្តបែនដឹកដី រេចង្កូតទៅខាងស្ដាំដៃធ្លាក់ប្រឡាយដាំក្បាលរថយន្តកប់ចូលភក់ គាប់ជាប់តៃកុងក្នុងកាប៊ីន រងរបួសធ្ងន់។ ចំណែកបុរស ២ នាក់ទៀតជាអ្នកដំណើរ រងរបួសស្រាល។ ករណីនេះ ដោយសារមិនអាចទាញយកតៃកុងចេញពីរថយន្តបាន សមត្ថកិច្ចមូលដ្ឋាន ក៏ទាក់ទងកងសង្គ្រោះ ៧១១ កងពលតូចលេខ ៧០ ជួយកាត់គាស់ទាញយកតៃកុងចេញបាន ដោយរងរបួសបាក់ដៃខាងស្ដាំ ត្រូវបានបញ្ជូនទៅសង្គ្រោះនៅមន្ទីរពេទ្យព្រះកុសុមៈ ហៅពេទ្យលោកសង្ឃ។ ដោយឡែករថយន្តសណ្ដោងរ៉ឺម៉កវិញ ខូចខាតផ្នែកខាងក្រោយតិចតួចតែប៉ុណ្ណោះ។

ក្រោយកើតហេតុ មិនអាចដោះស្រាយគ្នាបានភ្លាមៗ មធ្យោបាយទាំងអស់ ត្រូវសមត្ថកិច្ចជំនាញចរាចរណ៍ក្រុង វាស់វែងយកទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំដំណោះស្រាយ៕

អត្ថបទ ៖ សុខា