ចរាចរណ៍

រថយន្តកាមរីមួយគ្រឿង បើកលឿនរ៉េចង្កូតជ្រុលបុកក្បាលនាគពុះចែកទ្រូងបាក់អស់មួយកង់ នៅមុខវិទ្យាល័យជាស៊ីមសាមគ្គី

បានផុស

៤ years មុន

នៅ

ថ្ងៃពុធ ២២ កញ្ញា ២០២១

ដោយ

ភ្នំពេញ ៖ ក្បាលនាគពុះចែកទ្រូងផ្លូវមួយកង់ ត្រូវរថយន្តកាមរី ហាយប្រ៊ីតមួយគ្រឿង បើកបរដោយបុរសម្នាក់ក្នុងល្បឿនលឿន មិនប្រយ័ត្នជ្រុលរេចង្កូតបុកផ្ទប់ពេញទំហឹង បង្កឲ្យមានការភ្ញាក់ផ្អើលកាលពីវេលាម៉ោង១៩ និង០០នាទីយប់ ថ្ងៃទី២២ ខែកញ្ញា ឆ្នាំ២០២១ នៅចំណុចទល់វិទ្យាល័យជាស៊ីម សាមគ្គី ស្ថិតតាមបណ្តោយផ្លូវលេខ២៧១ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។ រថយន្តបង្កម៉ាក កាមរីហាយប្រ៊ីត ពណ៌ទឹកប្រាក់ ពាក់ស្លាកលេខ ភ្នំពេញ 2T-1752។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមប្រភពព័ត៌មានឲ្យដឹងថា នៅមុនពេលកើតហេតុ គេសង្កេតឃើញរថយន្តបង្ក បើកបរដោយបុរសម្នាក់ធ្វើដំណើរតាមបណ្តោយផ្លូវលេខ២៧១ ក្នុងទិសដៅ ពីជើងទៅត្បូង និងក្នុងល្បឿនលឿន គួរសម។ លុះដល់ចំណុចកើតហេតុ ដែលជាចំណុចផ្លូវរាងកោងផងនោះ ស្រាប់តែរថយន្តខាងលើបានបួងចង្កូតជ្រុល បណ្តាលឲ្យរេចង្កូតទៅបុកក្បាលនាគពុះចែកទ្រូងផ្លូវពេញទំហឹង បណ្តាលឲ្យបាក់អស់មួយកង់ ចំណែករថយន្តបង្ក ត្រូវបាក់កាឡេកង់មុខផ្នែកខាងឆ្វេង មិនអាចបន្តដំណើរទៅមុខបានទៀតឡើយ។

ក្រោយកើតហេតុ កម្លាំងសមត្ថកិច្ចមូលដ្ឋាន សហការជាមួយជំនាញ ចុះអន្តរាគមន៍ធ្វើការវាស់វែងអូសយករថយន្តបង្កទៅរក្សាទុក នៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយទៅតាមនីតិវិធីច្បាប់នៅពេលក្រោយ៕

ដោយ ៖ លីហេង