ចរាចរណ៍

អាកាសធាតុប្រែប្រួល មេឃចុះអាប់បណ្ដាលឲ្យគ្រោះថ្នាក់ចរាចរណ៍២ករណី របួសធ្ងន់២នាក់ក្នុងទីតាំងដដែល

បានផុស

៤ years មុន

នៅ

ថ្ងៃពុធ ២៣ កុម្ភៈ ២០២២

ដោយ

ពោធិ៍សាត់ ៖ ហេតុការណ៍គ្រោះថ្នាក់ចរាចរណ៍ពីរករណីនេះបានកើតឡើង នៅម៉ោងបន្ទាប់គ្នា ថ្ងៃទី២២ ខែកុម្ភៈ ឆ្នាំ២០២២ ស្ថិតនៅលើកំណាត់ផ្លូវជាតិលេខ៥ ស្ថិតក្នុងភូមិអណ្តូងក្រសាំង ឃុំស្នាមព្រះស្រុកបាកាន ខេត្តពោធិ៍សាត់។

នគរបាលចរាចរណ៍ នៃអធិការដ្ឋាននគរបាលស្រុកបាកាន បានឲ្យដឹងថា នៅព្រឹកថ្ងៃទី២២ ខែកុម្ភៈ អាកាសធាតុប្រែប្រួល បង្កឲ្យមានភ្លៀងធ្លាក់ និងចុះអាប់ងងឹត ដែលផ្តល់ការលំបាក ក្នុងការធ្វើដំណើរលើដងផ្លូវ បណ្តាលឲ្យកើតមានគ្រោះថ្នាក់ចរាចរណ៍កើតឡើងចំនួន០២ករណី ក្នុងភូមិសាស្ត្រភូមិអណ្តូងក្រសាំង ឃុំស្នាមព្រះ ស្រុកបាកាន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា នៅវេលាម៉ោង០៧និង១៥នាទី នៅចន្លោះបង្គោលគីឡូម៉ែត្រលេខ១៩៦-១៩៧ មានករណីម៉ូតូបុករថយន្តបត់ឆ្លងផ្លូវ ដោយម៉ាកហុងដា សេ១២៥ ពណ៌ខ្មៅ ស៊េរីឆ្នាំ២០១៩ ពាក់ស្លាកលេខ ពោធិ៍សាត់ 1I- 5065 បើកបរក្នុងទិសដៅពីលិចទៅកើត បានបុករថយន្តម៉ាកម៉ាសស្តារ ពណ៌ស ពាក់ស្លាកលេខ ភ្នំពេញ 2AT-8852 បើកបរក្នុង ទិសដៅស្របគ្នា មកដល់ចំណុចខាងលើ បានបត់ឆ្លងផ្លូវ បណ្តាលឲ្យអ្នកបើកបរម៉ូតូឈ្មោះ ម៉ៅ រិទ្ធី ភេទប្រុស អាយុ២០ឆ្នាំ រស់នៅភូមិត្រពាំងជង ឃុំត្រពាំងជង ស្រុកបាកាន រងរបួសបាក់កជើងខាងស្តាំ សមត្ថកិច្ចបញ្ជូនទៅសង្គ្រោះនៅមន្ទីរពេទ្យបង្អែកខេត្តពោធិ៍សាត់ វត្ថុតាងសមត្ថកិច្ចយកមករក្សាទុកនៅប៉ុស្តិ៍នគរបាលរដ្ឋបាលស្នាមព្រះ។

ចំណែកឯ នៅវេលាម៉ោង ០៨និង២០នាទី ចន្លោះបង្គោលគីឡូម៉ែត្រលេខ១៩៨-១៩៩ មានករណីរថយន្តបុកក្មេងរត់ឆ្លងផ្លូវ ដោយរថយន្តម៉ាកស៊ាំងយ៉ុង ពណ៌សំបកឪឡឹក ស្លាកលេខកន្ទុយ 1318 បើកបរក្នុងទិសដៅពីលិចទៅកើត មកដល់ចំណុចខាងលើ បានបុកក្មេងរត់ឆ្លងផ្លូវពីជើងទៅត្បូង បណ្តាលឲ្យក្មេងប្រុស ឈ្មោះ ធឿន ចាន់សំណាង អាយុ១១ឆ្នាំ រស់នៅភូមិ.ឃុំកើតហេតុ រងរបួសធ្ងន់ ត្រូវបានក្រុមគ្រួសារបញ្ជូនទៅសង្គ្រោះនៅគ្លីនិកឯកជន ចំពោះរថយន្តបានបើករត់គេចខ្លួនបាត់៕

ដោយ ៖ លាន គ្រន