រថយន្តកុងតឺន័រមួយគ្រឿងក្រឡាប់ផ្ងារជើងលើផ្លូវក្រោមដីស្ពានអាកាសស្ទឹងមានជ័យ

រថយន្ដកុងតឺន័រមួយគ្រឿងបើកចុះផ្លូវក្រោមដីស្ពានអាកាសស្ទឹងមានជ័យ លឿនជ្រុលក្រឡាប់ផ្ងារជើងបណ្ដាលកកស្ទះផ្លូវក្រោមដី ទាំងស្រុង។

ករណីនេះបានកើតឡើងកាលពីវេលាម៉ោង១០និង៥០នាទីព្រឹកថ្ងៃទី១០ ខែកុម្ភៈ ឆ្នាំ២០២៥ នៅចំណុចផ្លូវក្រោមដី (ស្ពានអាកាសស្ទឹងមានជ័យ)ក្នុងសង្កាត់ស្ទឹងមានជ័យទ១ ខណ្ឌមានជ័យ រាជធានីភ្នំពេញ។

តាមប្រភពព័ត៍មាននៅកន្លែងកើតហេតុខាងលើបានឲ្យដឹងថា មុនពេលកើតហេតុ គេឃើញបុរស២នាក់បើករថយន្តកុងតឺន័រមួយគ្រឿង ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ3C-7460 ធ្វើដំណើរចុះមកផ្លូវក្រោមដី (ស្ពានអាកាសស្ទឹងមានជ័យ ) ក្នុងល្បឿនលឿន ខណៈមកដល់ចំណុចផ្លូវកោង ក៏ក្រឡាប់អូសជាច្រើនម៉ែត្របណ្ដាលអោយអ្នកបើកបររងរបួសបែកក្បាល និងរលាត់ជើង។ ភ្លាមៗ បុរសទាំង២នាក់ បាននាំលូនចេញពីរថយន្ត រួចនាំគ្នាគេចខ្លួនបាត់។

ក្រោយពេលកើតហេតុ សមត្ថកិច្ចមូលដ្ឋានចុះដល់ទីតាំងកើតហេតុរួចធ្វើការទំនាក់ទំនងទៅកាន់មន្រ្តីជំនាញ នៃការិយាល័យនគរបាលចរាចរណ៍ផ្លូវគោក ដើម្បីស្ទូចយករថយន្តបង្កទៅរក្សាទុករង់ចាំដោះស្រាយពេលក្រោយ៕

អត្ថបទ៖ រដ្ឋា