ករណីដាច់ចរន្តអគ្គិសនី ពីអនុស្ថានីយក្រចេះ (GS34-F2) យប់មិញ បណ្តាលមកពីរន្ទះបាញ់

បើយោងតាមការ​ឱ្យដឹង​ពី​មន្ត្រី​បច្ចេកទេសនៃអគ្គីសនីខេត្តក្រចេះ បាន​គូសបញ្ជាក់ឱ្យដឹងថា ករណីយដាច់ចរន្តអគ្គិសនីនៅទីតាំងមួយចំនួន ស្ថិតនៅក្នុងក្រុងក្រចេះ នាវេលាម៉ោង ២២:២៦នាទីយប់ ថ្ងៃទី០៨ ខែតុលា ឆ្នាំ២០២៥ មូលហេតុគឺបណ្តាលមករន្ទះបាញ់។

នាវេលាម៉ោង ២២:២៦នាទីយប់ ថ្ងៃទី០៨ ខែតុលា ឆ្នាំ២០២៥ ចរន្តអគ្គិសនីពីអនុស្ថានីយក្រចេះ (GS34-F2) ត្រូវបានកាត់ផ្តាច់ បណ្តាលឱ្យដាច់ចរន្តអគ្គិសនីនៅទីតាំងមួយចំនួន ស្ថិតនៅក្នុងក្រុងក្រចេះ ប៉ះពាល់ស្រុកឆ្លូង ប៉ះពាល់មួយផ្នែកស្រុកចិត្របុរី និងប៉ះពាល់មួយផ្នែកស្រុកសំបូរ។

ប្រភពពីអគ្គីសនីក្រចេះ បន្តថា ក្រុមការងារបច្ចេកទេស​បាននិងកំពុងធ្វើការស្វែងរកកំហូច ដើម្បីជួសជុល និងភ្ជាប់​ចរន្តអគ្គិសនីជូនអតិថិជនឱ្យបានប្រើប្រាស់ឡើងវិញ។ ជាក់ស្តែង បន្ទាប់ពីប្រើពេលអស់ជាច្រើនម៉ោង ក្រុមការងារបច្ចេកទេស បានរកឃើញឈានដល់ទីតាំងកំហូច គឺដាច់​ចរន្តអគ្គិសនីពី​អនុស្ថានីយក្រចេះ (GS34-F2) មូលហេតុបណ្តាលមកពីរន្ទះបាញ់ ដាច់ខ្សែ​បណ្ដាញ​តង់ស្យុងមធ្យម (MV) ចំនួន ០១ សរសៃ ស្ថិតនៅភូមិគោលាប់ ដែលបណ្តាល​ឱ្យដាច់​ចរន្តនៅ​ទីតាំង​មួយ​ចំនួន​ស្ថិត​នៅ៖ (១) សង្កាត់ក្រចេះ សង្កាត់អូរឫស្សី សង្កាត់រកាកណ្ដាល សង្កាត់ក្រគរ ក្រុងក្រចេះ (២) ស្រុកឆ្លូង (៣) មួយផ្នែកស្រុកចិត្របុរី (៤) មួយផ្នែកស្រុកសំបូរ។

ក្រុមការងារបច្ចេកទេសបានធ្វើការពិនិត្យ និងតភ្ជាប់ចរន្តជូនអតិថិជនឱ្យមានចរន្តអគ្គិសនីប្រើប្រាស់ឡើងវិញ នៅវេលាម៉ោង ០០:០២ នាទីរំលងអធ្រាត្រ ឈានចូលថ្ងៃទី០៩ ខែតុលា ឆ្នាំ២០២៥។ លើកលែងតែនៅ​តំបន់មួយ​ចំនួន ស្ថិតនៅភូមិអូរឫស្សី២ ភូមិកន្រ្ទីង សង្កាត់អូរឫស្សី. ភូមិទួលមនោរម្យ សង្កាត់ក្រគរ ក្នុងក្រុងក្រចេះ និងឃុំគោលាប់ ស្រុកចិត្របុរី និងចាប់ពីស្ពានក្រគរ រហូតដល់ស្រុកសំបូរ មិនទាន់អាចដំណើរការឡើងវិញបាន។

ក្រុមការងារបច្ចេកទេស កំពុងធ្វើការជួសជុល និងភ្ជាប់ចរន្តអគ្គិសនីជូនអតិថិជនឱ្យបានប្រើប្រាស់ឡើងវិញ នៅពេលទទួលបានព័ត៌មានបន្ថែមពីការដាច់ចរន្តអគ្គិសនីនេះ ក្រុមការងារនឹងជូនដំណឹងជាបន្តបន្ទាប់ទៀត៕

អត្ថបទ៖ ប្រុញ វិធិន