មិនញញើតដៃ! ក្រុម IS កាត់ក្បាលមនុស្សជាង ៥០ នាក់នៅប្រទេសម៉ូហ្សំប៊ិក

ប្រព័ន្ធផ្សព្វផ្សាយរដ្ឋបានរាយការណ៍ថា មនុស្សជាង ៥០ នាក់ត្រូវបានកាត់ក្បាលនៅភាគខាងជើងប្រទេសម៉ូហ្សំប៊ិក (Mozambique) ដោយសកម្មប្រយុទ្ធរដ្ឋឥស្លាម (IS) ។

របាយការណ៍ផ្សេងទៀតបាននិយាយថា ក្រុមសកម្មប្រយុទ្ធបានបង្វែរទីលានបាល់ទាត់ក្នុងភូមិមួយទៅជា “កន្លែងប្រហារជីវិត” ដែលពួកគេបានកាត់ក្បាល និងគរសាកសព ខណៈដែលមនុស្សជាច្រើនត្រូវបានគេកាត់ក្បាលនៅក្នុងភូមិមួយផ្សេងទៀតផងដែរ ។

គិតត្រឹមពេលនេះមនុស្សរហូតដល់ ២,០០០ នាក់ត្រូវបានសម្លាប់ និងប្រហែល ៤៣០,០០០ នាក់បានបាត់បង់ផ្ទះសម្បែងក្នុងជម្លោះនៅខេត្តមួយដែលមានជនជាតិមូស្លីមភាគច្រើននៃប្រទេសម៉ូហ្សំប៊ិក ។

ស្របពេលជាមួយគ្នានេះរដ្ឋាភិបាលប្រទេសម៉ូហ្សំប៊ិកបានអំពាវនាវរកជំនួយអន្តរជាតិដើម្បីទប់ស្កាត់ការបះបោរនេះផងដែរដោយនិយាយថា កងទ័ពរបស់ខ្លួនត្រូវការការបណ្តុះបណ្តាលជំនាញបន្ថែម ។

ចំណែកក្រុមសិទ្ធិមនុស្សនិយាយថា កងកម្លាំងសន្តិសុខម៉ូហ្សំប៊ិកក៏បានរំលោភសិទ្ធិមនុស្សផងដែររួមមានការចាប់ខ្លួនតាមអំពើចិត្ត ការធ្វើទារុណកម្ម និងការសម្លាប់ក្នុងអំឡុងពេលប្រតិបត្តិការដើម្បីទប់ស្កាត់ការបះបោរនេះ ។

គួររម្លឹកផងដែរថា កាលពីខែមេសាមនុស្សជាង ៥០ នាក់ត្រូវបានគេកាត់ក្បាល ឬបាញ់សម្លាប់នៅក្នុងការវាយប្រហារនៅក្នុងភូមិមួយនៃខេត្ត Cabo Delgado ហើយកាលពីដើមខែនេះមនុស្ស ៩ នាក់ក៏ត្រូវបានកាត់ក្បាលនៅក្នុងខេត្តនេះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ BBC