ក្រុមតាលីបង់ សម្លាប់មេខ្លោង បំផ្ទុះគ្រាប់បែកនៅអាកាសយានដ្ឋានក្រុង កាប៊ុល

មន្ត្រីអាមេរិកនិយាយថា មេក្រុមរដ្ឋឥស្លាម ដែលទទួលខុសត្រូវចំពោះការបំផ្ទុះគ្រាប់បែកឆ្នាំ២០២១ នៅអាកាសយានដ្ឋានក្រុងកាប៊ុល ពេលនេះត្រូវបានក្រុមតាលីបង់សម្លាប់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបំផ្ទុះគ្រាប់បែកនៅខែសីហាឆ្នាំ២០២១ បានសម្លាប់ជនស៊ីវិលប្រមាណ១៧០នាក់ និងទាហានអាមេរិក១៣នាក់ ខណៈមនុស្សម្នាព្យាយាមភៀសខ្លួនចេញពីប្រទេសអាហ្វហ្គានីស្ថានដែលគ្រប់គ្រងដោយក្រុមតាលីបង់។

គួរបញ្ជាក់ថា ការបំផ្ទុះនោះបានកើតឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីរដ្ឋាភិបាលលោកខាងលិច ព្រមានពលរដ្ឋរបស់ពួកគេឲ្យនៅឆ្ងាយពីអាកាសយានដ្ឋានអន្តរជាតិទីក្រុងកាប៊ុល ដោយសារតែការគំរាមកំហែងនៃការវាយប្រហារដោយក្រុម IS-K ដែលជាសាខាអាហ្វហ្គានីស្ថានរបស់ក្រុមរដ្ឋឥស្លាម។

ក្រុមមន្ត្រីអាមេរិកបានប្រាប់ CBS ថា មេដឹកនាំក្រុមរដ្ឋឥស្លាម បានស្លាប់កាលពីប៉ុន្មានសប្តាហ៍មុនមកម្ល៉េះ ប៉ុន្តែគេត្រូវការពេលវេលាដើម្បីបញ្ជាក់ពីការស្លាប់របស់គាត់។

ទោះបីជាយ៉ាងណាក៏ដោយ ឈ្មោះរបស់គាត់មិនទាន់ត្រូវបានបញ្ជាក់ទេ។

យោងតាមរបាយការណ៍មួយនៅក្នុងកាសែត New York Times, សហរដ្ឋអាមេរិក បានដឹងពីមរណភាពរបស់មេដឹកនាំរូបនេះកាលពីដើមខែមេសា។

យ៉ាងណា គេមិនច្បាស់ទេថាតើគាត់គឺជាគោលដៅរបស់ក្រុមតាលីបង់ ឬថាតើគាត់ត្រូវបានសម្លាប់ក្នុងអំឡុងការប្រយុទ្ធរវាងក្រុម IS និងក្រុមតាលីបង់មែនឬក៏អត់៕

ប្រែសម្រួល៖ Vann Vann

ប្រភព៖ BBC

ចុចអាន៖ តាលីបង់ ចូលវាយឆ្មក់កន្លែងលាក់ខ្លួនរបស់ក្រុម IS សម្លាប់ និងចាប់ខ្លួនច្រើននាក់