ខ្យល់កន្ត្រាក់បោកបក់ផ្ដួលរលំដើមឈើមួយដើមសង្កត់មនុស្សពីរនាក់

យ៉ាងហោចណាស់ក៏មានមនុស្សពីរនាក់ដែរដែលបានរងរបួស និងបានបញ្ជូនទៅកាន់មណ្ឌលសុខភាព ខណៈដែលជនរងគ្រោះកំពុងជិះម៉ូតូ និងគោយន្ដពេលមេឃកំពុងភ្លៀង ព្រមទាំងមានខ្យល់បោកបក់ផងនោះក៏ធ្វើឲ្យដើមឈើមួយដើមដួលរលំសង្កត់លើជនរងគ្រោះ។

ហេតុការណ៍នៃគ្រោះធម្មជាតិនេះបានកើតឡើងកាលពីថ្ងៃទី១៦ ខែតុលា ឆ្នាំ២០២៥​ វេលាម៉ោង​៤និង៤០នាទី​ល្ងាច នៅត្រង់ចំណុចភូមិភ្នំប្រាំពីរ ឃុំបួរ ស្រុកភ្នំព្រឹក ខេត្តបាត់ដំបង (មុខមណ្ឌលសុខភាព បួរ) ។

បើតាមការលើកឡើងពីលោក សំ វីរៈ អធិការនគរបាលស្រុកភ្នំព្រឹក បានឱ្យដឹងថា នៅមុនពេលកើតហេតុគឺមានភ្លៀង​ធ្លាក់មួយមេយ៉ាងធំ អមជាមួយនឹងខ្យល់កន្ត្រាក់ បានបោកបក់ធ្វើឲ្យរលំដើមឈើមួយដើមកាត់ផ្លូវសង្កត់លើគោយន្តកន្រ្តៃ  មួយគ្រឿង និងម៉ូតូមួយគ្រឿងបណ្ដាលឲ្យមនុស្ស ២នាក់រងរបួសព្រមទាំងបានបញ្ជូនចូលសង្គ្រោះនៅក្នុងមណ្ឌលសុខភាពបួរតែម្ដង។

ភ្លាមៗនោះដែរកម្លាំងអាជ្ញាធរបានចុះកាត់ដើមឈើដែលរលំនោះគឺជាប្រភេទដើមស្ដៅ ចេញពីផ្លូវដើម្បីកុំឲ្យមានការកកស្ទះចរាចរណ៍ ដែលនេះគឺជាគ្រោះធម្មជាតិមិនអាចមាននរណាប៉ាន់ស្មានដឹងមុនឡើយ៕

អត្ថបទ៖ សោ និយមរ័ត្ន