ព័ត៌មានជាតិ

១០ចំណុចសំខាន់ៗនៃកិច្ចព្រមព្រៀងសន្ដិភាពកម្ពុជា-ថៃ

បានផុស

៨ ខែ មុន

នៅ

ថ្ងៃសៅរ៍ ១៨ តុលា ២០២៥

ដោយ

ប្រទេសកម្ពុជា និងថៃបានឈានដល់ការព្រមព្រៀងគ្នា១០ចំណុចលើឯកសារកិច្ចព្រមព្រៀងសន្តិភាពដែលនឹងត្រូវចុះហត្ថលេខានៅចុងខែតុលា ឆ្នាំ២០២៥នេះ។ ក្នុងកិច្ចព្រមព្រៀងនោះមានចាប់តាំងពីការប្ដេជ្ញាចិត្តរបស់ប្រទេសទាំងពីលើការគោរពបទឈប់បាញ់ រហូតដល់ការដោះលែងទាហានទាំង១៨នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ទីភ្នាក់ងារសារព័ត៌មានជាតិកិច្ចព្រមព្រៀងដែលបានឯកភាព១០ចំនុចនោះរួមមាន៖

១. ការប្តេជ្ញាចិត្តរបស់ប្រទេសយើងទាំងពីរ ក្នុងការគោរពបទឈប់បាញ់ឱ្យបានម៉ឺងម៉ាត់

២. ការគោរពគ្នាទៅវិញទៅមក ជាពិសេសការគោរពគោលការណ៍នៃអធិបតេយ្យ បូរណភាពទឹកដី ឯករាជ្យរបស់ប្រទេសនីមួយៗ

៣. ការតាំងចិត្តសម្រាប់ការស្តារទំនុកទុកចិត្តរវាងគ្នាទៅវិញទៅមក (ការស្តារទំនាក់ទំនងការទូតឡើងវិញ ដោយសារកន្លងទៅយើងបានទម្លាក់កម្រិតការទូតមកត្រឹមថ្នាក់លេខាធិការរបស់ស្ថានទូត)

៤. ការរួមគ្នា និងសហការគ្នាដើម្បីប្រយុទ្ធប្រឆាំងនឹងឧក្រិដ្ឋកម្មឆ្លងដែន ក្នុងនោះក៏មានបញ្ហាការឆបោកតាមបច្ចេកវិទ្យា (Online Scam)

៥. ការបោសសម្អាតមីននៅតាមព្រំដែន (ក្រុមការងារនឹងធ្វើការកំណត់តំបន់ណាត្រូវដោះមុន តំបន់ណាត្រូវដោះក្រោយ)

៦. ការដកអាវុធធុនធ្ងន់ទាំងឡាយចេញពីព្រំដែន ហើយបញ្ជូនទៅកាន់មូលដ្ឋានទ័ពរៀងៗខ្លួនវិញ

៧. ភាគីថៃនឹងដោះលែងវីរកងទ័ពកម្ពុជាទាំង១៨រូប ដែលត្រូវចាប់ខ្លួនតាំងពីថ្ងៃទី២៩ ខែកក្កដា ឆ្នាំ២០២៥ ដោយមិនរង់ចាំទៀតទេ ។

៨. ការដោះស្រាយបញ្ហាព្រំដែនដោយសន្តិវិធី

៩. ការគោរពនូវគោលការណ៍មិនប្រើប្រាស់កម្លាំងដើម្បីដោះស្រាយបញ្ហាជម្លោះផ្សេងៗ

១០. ការអះអាងសារជាថ្មីនូវការប្តេជ្ញាចិត្តរៀងៗខ្លួន ដើម្បីធ្វើយ៉ាងណារួមគ្នាក្នុងឋានៈជាប្រទេសជិតខាងអចិន្ត្រៃយ៍ ក្នុងការស្តារទំនាក់ទំនងជាប្រក្រតីភាពឡើងវិញ នាំមកវិញនូវសុខសន្តិភាព វិបុលភាព សម្រាប់ប្រទេស និងប្រជាជន នៃប្រទេសទាំងពីរ”។

គួរឱ្យដឹងផងដែរថាលទ្ធផលនៃកិច្ចព្រមព្រៀងនេះគឺបន្ទាប់ពីរដ្ឋមន្ត្រីការបរទេសកម្ពុជា និងថៃ ដោយមានតំណាងប្រទេសម៉ាឡេស៊ី និងអាមេរិកសម្របសម្រួលនោះបានជជែកពេញមួយថ្ងៃទី១៧ ខែតុលា នៅប្រទេសម៉ាឡេស៊ី ខណៈការចុះហត្ថលេខានឹងត្រូវធ្វើឡើងនៅចុងខែតុលានេះដោយមានប្រធានាធិបតីអាមេរិកលោក ដូណាល់ ត្រាំ ធ្វើជាសាក្សីផងដែរ៕

អត្ថបទដោយ ហ៊ុន សិរីវឌ្ឍន៍