កីឡា

កម្ពុជា បង្កើតកំណត់ត្រា ឈ្នះមេដាយលើកដំបូងក្នុងកីឡាយុវជនទ្វីបអាស៊ី

បានផុស

៩ ខែ មុន

នៅ

ថ្ងៃអង្គារ ២១ តុលា ២០២៥

ដោយ

កីឡាករយុវជនជម្រើសជាតិកម្ពុជា ភុក ដានីញែល ទទួលបានមេដាយសំរិទ្ធ ១ គ្រឿង លើប្រភេទកីឡាបញ្ចស៊ីឡាត់ ក្នុងព្រឹត្តិការណ៍កីឡាយុវជនទ្វីបអាស៊ី លើកទី៣ កាលពីល្ងាចថ្ងៃទី២០ ខែតុលា ឆ្នាំ ២០២៥ នៅប្រទេសបារ៉ែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ ភុក ដានីញែល បានឡើងដល់វគ្គពាក់កណ្តាលផ្តាច់ព្រ័ត្រ ដោយជួបកីឡាករឥណ្ឌូណេស៊ី Habbil Furgon Winata ដែលជាម្ចាស់ក្បាច់គុនលើប្រភេទកីឡាបញ្ចស៊ីឡាត់នេះ ហើយបានចាញ់ ដើម្បីទទួលបាន មេដាយសំរិទ្ធ ១ គ្រឿង លើវិញ្ញាសាប្រយុទ្ធទម្ងន់ ៥៥គីឡូក្រាម។

នេះជាមេដាយលើកដំបូងសម្រាប់ប្រទេសកម្ពុជាដែលទទួលបានក្នុងកីឡាយុវជនទ្វីបអាស៊ី បន្ទាប់ពីធ្លាប់ចូលរួមប្រកួតពីរលើកកន្លងមកមិនធ្លាប់ទទួលបានមេដាយ។ លើកទី១ ឆ្នាំ២០០៩ នៅប្រទេសសិង្ហបុរី កម្ពុជា បានបញ្ជូនអត្តពលិកចូលរួមប្រកួតចំនួន ៣ នាក់ ប៉ុន្តែមិនទទួលបានលទ្ធផលល្អទេ ហើយលើកទី២ ឆ្នាំ ២០១៣ នៅប្រទេសចិន កម្ពុជា បានបញ្ជូនអត្តពលិក ២ នាក់ចូលរួមប្រកួតហើយក៏មិនទទួលបានមេដាយណាមួយដែរ។

សម្រាប់ព្រឹត្តិការណ៍កីឡា យុវជនទ្វីបអាស៊ី លើកទី៣ នៅប្រទេសបារ៉ែន កម្ពុជា បានបញ្ជូនកីឡាករ កីឡាការិនីច្រើនបំផុតរហូតដល់ ៥៥នាក់ លើ១៤ប្រភេទកីឡាចូលរួមប្រកួត។ ដំណើរការប្រកួតឈានចូលថ្ងៃទី២ គិតត្រឹមថ្ងៃទី២០ ខែតុលា កម្ពុជា រកបានមេដាយជាលើកដំបូងក្នុងប្រវត្តិសាស្ត្ររបស់ខ្លួនដោយយុវជន ភុក ដានីញែល។

កម្ពុជារំពឹងរកបានមេដាយបន្ថែមទៀត ដោយសារមានកីឡាជាច្រើនប្រភេទទៀតដែលត្រូវប្រកួតជាបន្តបន្ទាប់ដូចជា កីឡាគុនខ្មែរ ចំបាប់ ឬជឺជីតស៊ូជាដើម។

ការចូលរួមទ្រទ្រាយធំរបស់ កម្ពុជា ក្នុងព្រឹត្តិការណ៍លើកទី៣នេះ លើសពីការប្រកួតដើម្បីដណ្តើមមេដាយ។ កម្ពុជាបានបញ្ជូនក្រុមការងារ និងអ្នកជំនាញទៅសិក្សាស្វែងយល់ដើម្បីត្រៀមខ្លួនសម្រាប់ឆ្នាំ ២០២៩ ដែលកម្ពុជាទទួលភារកិច្ចធ្វើម្ចាស់ផ្ទះព្រឹត្តិការណ៍កីឡាយុវជនទ្វីបអាស៊ីដែលមានរយៈពេល ៤ ឆ្នាំម្តងនេះ។ ក្នុងនោះមានតារាសិល្បៈប្រមាណ ៤៥នាក់ត្រូវសម្តែង និងបង្ហាញពីសក្តានុពលរបស់កម្ពុជាក្នុងពិធីបិទដើម្បីទទួលយកទង់ជាផ្លូវការមកកាន់កម្ពុជាសម្រាប់ការត្រៀមខ្លួនឲ្យបានម៉ត់ចត់ក្នុងរយៈពេល៤ឆ្នាំខាងមុខ៕