ព័ត៌មានអន្ដរជាតិ

អាមេរិកគំរាមក្រុមហាម៉ាសឲ្យរំសាយអាវុធ សម្រាប់ដំណាក់កាលបន្ទាប់នៃបទឈប់បាញ់

បានផុស

៨ ខែ មុន

នៅ

ថ្ងៃពុធ ២២ តុលា ២០២៥

ដោយ

Chheang

សហរដ្ឋអាមេរិក បានបង្កើនសម្ពាធលើក្រុមហាម៉ាសឲ្យចាប់ផ្តើមការរំសាយអាវុធនៅក្នុងដំណាក់កាលបន្ទាប់នៃបទឈប់បាញ់តំបន់ហ្គាហ្សា ខណៈដែលប្រធានាធិបតី ដូណាល់ ត្រាំ កំពុងស្វែងរកការធានានូវអ្វីដែលលោកហៅថា«សន្តិភាពចុងក្រោយ» ដើម្បីបញ្ចប់សង្រ្គាមរវាងអ៊ីស្រាអែលនិងប៉ាឡេស្ទីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងដំណើរទស្សនកិច្ចទៅកាន់ប្រទេសអ៊ីស្រាអែលកាលពីថ្ងៃអង្គារទី២១ខែតុលា អនុប្រធានាធិបតីអាមេរិក លោក JD Vance បាននិយាយថា ផែនការបទឈប់បាញ់គឺ«ដំណើរការល្អជាងការរំពឹងទុក» ប៉ុន្តែបានព្រមានហាម៉ាសថា វានឹងត្រូវបាន«លុបចោល» បើក្រុមសកម្មប្រយុទ្ធប៉ាឡេស្ទីនមួយនេះមិនព្រមសហការ។ លោកបានលើកឡើងអំពីការគំរាមកំហែងរបស់លោកត្រាំ ដែលថា បើហាម៉ាសមិនអនុវត្តបទឈប់បាញ់ នោះទីបញ្ចប់របស់ខ្លួននឹងត្រូវវិនាសខ្ទេចគ្មានសល់។

ការលើកឡើងនេះ បានកើតឡើងចំពេលដែលមានការចោទប្រកាន់គ្នាអំពីការរំលោភបទឈប់បាញ់ ដែលបានចូលជាធរមានកាលពីដើមខែតុលានេះ ពាក់ព័ន្ធនឹងការបញ្ជូនសាកសពចំណាប់ខ្មាំង ការដឹកជំនួយ និងការបើកព្រំដែនឡើងវិញ។ ក្រសួងសុខាភិបាលហ្គាហ្សា បាននិយាយថា អ៊ីស្រាអែលបានសម្លាប់ជនជាតិប៉ាឡេស្ទីនយ៉ាងហោចណាស់ ៨៧នាក់ ចាប់តាំងពីបទឈប់បាញ់ ខណៈដែលទាហានអ៊ីស្រាអែលពីរនាក់ ត្រូវបានសម្លាប់កាលពីចុងសប្តាហ៍។

គណៈប្រតិភូក្រុមហាម៉ាសនៅក្នុងប្រទេសតួកគី បានលើកឡើងថា ក្រុមខ្លួននៅតែប្តេជ្ញាចិត្តចំពោះកិច្ចព្រមព្រៀង ទោះបីជាមាន«ការរំលោភបទឈប់បាញ់ម្តងហើយម្តងទៀតរបស់អ៊ីស្រាអែលក៏ដោយ»។ ប្រទេសតួកគី រួមជាមួយនឹងអេហ្ស៊ីប និងកាតា បានជួយសម្របសម្រួលឯកសារបទឈប់បាញ់របស់លោកត្រាំ កាលពីដើមខែនេះនៅទីក្រុង Sharm el-Sheikh។

ផែនការ២០ចំណុចរបស់លោកត្រាំ អំពាវនាវឲ្យក្រុមហាម៉ាសរំសាយអាវុធទាំងស្រុង ដើម្បីឲ្យអ៊ីស្រាអែលដកខ្លួនចេញពីតំបន់ហ្គាហ្សា និងការបង្កើតអាជ្ញាធរបច្ចេកទេសប៉ាឡេស្ទីន ក្រោមការត្រួតពិនិត្យជាអន្តរជាតិ។ កងកម្លាំងរក្សាសន្តិភាពពហុជាតិ នឹងជំនួសតួនាទីសន្តិសុខរបស់ក្រុមហាម៉ាស។

លោក Vance ដែលនឹងជួបនាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ នៅថ្ងៃពុធនេះ បានបញ្ជាក់ថា លោកមានសុទិដ្ឋិនិយម ប៉ុន្តែបានព្រមានថា «ការសម្រេចបានពេញលេញនៃផែនការនេះនឹងចំណាយពេលយូរណាស់»។

ក្រុមសិទ្ធិមនុស្សបានរិះគន់ការគំរាមកំហែងទាំងបង្ខំរបស់សហរដ្ឋអាមេរិកថាជា ការរំលោភលើច្បាប់អន្តរជាតិ ប៉ុន្តែទីក្រុងវ៉ាស៊ីនតោនទទូចថា ការរំសាយអាវុធមានសារៈសំខាន់ចំពោះសន្តិភាពយូរអង្វែង។

សូមជម្រាបជាថ្មីម្ដងទៀតថា ក្រសួងសុខាភិបាលហ្គាហ្សា បានបង្ហាញតួលេខថា ជនជាតិប៉ាឡេស្ទីនចំនួន ៦៨ ២២៩នាក់ ត្រូវបានសម្លាប់ចាប់តាំងពីសង្គ្រាមផ្ទុះឡើងបន្ទាប់ពីការវាយប្រហារកាលពីថ្ងៃទី៧ខែតុលាឆ្នាំ២០២៣របស់ក្រុមហាម៉ាស ដែលបានធ្វើឲ្យជនជាតិអ៊ីស្រាអែលចំនួន ១ ២០០នាក់បានស្លាប់ និង ២៥១នាក់ត្រូវបានចាប់ធ្វើជាចំណាប់ខ្មាំង៕

ដោយ៖ ឈាង