អាជ្ញាធរខេត្តកណ្ដាលឱ្យបញ្ឈប់ការលក់ដូររំលោភចិញ្ចើមផ្លូវ ចាប់ពីស្ពានព្រែកហូរ ផ្លូវជាតិលេខ២

អាជ្ញាធរខេត្តកណ្ដាល នៅព្រឹកថ្ងៃទី២៤ ខែតុលានេះ ដឹកនាំដោយអភិបាលរងខេត្ត លោក ណុប ដារ៉ា បានចុះរៀបចំសណ្ដាប់ធ្នាប់តាមបណ្ដោយផ្លូវជាតិលេខ២ ចាប់ពីចំណុចស្ពានព្រែកហូរ ស្ថិតក្នុងសង្កាត់ព្រែកហូរ ក្រុងតាខ្មៅ ដោយអាជ្ញាធរឱ្យបញ្ឈប់ការលក់ដូររំលោភចិញ្ចើមផ្លូវ។

ដើម្បីសោភ័ណ្ឌភាព និងសុវត្ថិភាពក្នុងការធ្វើចរាចរណ៍ទៅមក លោក ណុប ដារ៉ា អភិបាលរងខេត្តកណ្ដាល បានប្រាប់អាជីវកដែលបានលក់ដូរលើចិញ្ចើមផ្លូវ នៅតំបន់ផ្សារព្រែកហូរ ចូលរួមសហការជាមួយអាជ្ញាធរមូលដ្ឋាន ដោយបញ្ឈប់ការលក់ដូរគ្មានសណ្ដាប់ធ្នាប់របៀបរៀបរយបែបនេះបន្តទៀត ដែលបង្កជាការកកស្ទះចរាចរណ៍។

បើតាមអភិបាលរងខេត្តរូបនេះ ការរៀបចំសោភ័ណ្ឌភាព និងសណ្ដាប់ធ្នាប់សាធារណៈឱ្យមានរបៀបរៀបរយតាមកំណត់ផ្លូវជាតិលេខ២ ជាការចូលរួមធានាក្នុងសកម្មភាពទីក្រុងស្អាត ប្រកបដោយបរិស្ថាន និងអនាម័យបានល្អប្រសើរ។ ម្យ៉ាងទៀតនោះ គឺដើម្បីជួយសម្រួលដល់ការធ្វើចរាចរណ៍របស់ប្រជាពលរដ្ឋទូទៅ កុំឱ្យមានការកកស្ទះបន្តទៀត និងជួយកាត់បន្ថយគ្រោះថ្នាក់ចរាចរណ៍បានមួយកម្រិតទៀតផងដែរ។

បន្ទាប់ពីទទួលបានការណែនាំពីអាជ្ញាធរ អាជីវករដែលបានដាក់តាំងលក់សម្ភារៈឥវ៉ាន់លើចិញ្ចើមផ្លូវសាធារណៈទាំងអស់ បានសហការជាមួយអាជ្ញាធរ ដោយបានស្ម័គ្រចិត្តបញ្ឈប់ការលក់រំលោភលើចិញ្ចើមផ្លូវសាធារណៈតទៅទៀត៕