ជម្លោះលុយមូលនិធិក្តៅគគុក Nawat ដាក់សម្ពាធ ឲ្យ Jom Phalang សងភ្លាមៗ

នៅក្នុងសារចុងក្រោយរបស់ម្ចាស់ស្ថាប័ន Miss Grand International (MGI) លោក Nawat Itsarakraisil កាលពីថ្ងៃទី១៤ តុលា បានដាក់សម្ពាធទៅលើ Kan Jom Phalang ឲ្យប្រគល់លុយមូលនិធិមកវិញភ្លាមៗ ហើយថែមទាំងបញ្ជាក់ថា ខ្លួនត្រូវតែជួបជាមួយប្រធានពិតប្រាកដ មិនមែនអ្នកតំណាងនោះទេ។

យ៉ាងណា នាពេលកន្លងមក មេ MGI រូបនេះ ធ្លាប់បង្ហោះសារអមជាមួយរូបភាពនៅលើទំព័រហ្វេសប៊ុក ដោយបញ្ជាក់ថា លោកបានផ្ទេរប្រាក់ចំនួន ៥០,០០០ បាតទៅឲ្យមូលនិធិនេះ ដោយជឿថាវាជាមូលនិធិរបស់ Kan Jom Phalang។ ពេលដឹងថាប្រធានមូលនិធិមិនមែនជា Jom Phalang លោកបានស្នើសុំយកប្រាក់វិញ។ នេះដោយសារតែព័ត៌មានមួយចំនួនត្រូវបានលាក់បាំង ហើយខ្វះតម្លាភាពជាក់ស្ដែង។ ជាពិសេសខ្លាចថា មូលនិធិអាចជាប់ពាកព័ន្ធនឹងលាងលុយកខ្វក់ ខណៈកំពុងស៊ើបអង្កេតពីប៉ូលិស។

ដ្បិតថាយ៉ាងនេះក៏ពិតមែន នៅក្នុងកំឡុងពេលសន្និសីទសារព័ត៌មាន បុគ្គល Jom Phalang បានបង្ហាញថា លោក Nawat បានបរិច្ចាគប្រាក់នេះយូរមកហើយ! ប្រាក់នេះទំនងជាត្រូវបានប្រើប្រាស់សម្រាប់សាងសង់ផ្លូវ។ ប្រសិនបើភាគីម្ខាងទៀតមានអារម្មណ៍មិនសប្បាយចិត្ត ខ្លួននឹងសងលុយផ្ទាល់ខ្លួន ដើម្បីទទួលខុសត្រូវទាំងស្រុង។

មិនតែប៉ុណ្ណោះ Jom Phalang ថែមទាំងអះអាងទៀតថា រាលថ្ងៃនេះខ្លួនមិនមានប្រាក់ច្រើនដើម្បីជួយនាពេលបច្ចុប្បន្ននេះទេ ហើយក៏មិនដែលបានទទួលប្រាក់ខែពីមូលនិធិសូម្បីតែមួយបាត។ សូម្បីតែ ប្រធានមូលនិធិ និងសមាជិកក្រុមប្រឹក្សាភិបាលណាមួយក៏មិនទទួលបានដែរ។

ទោះជាយ៉ាងណា Nawat បានបង្ហាញថា លោកមិនទទួលយកប្រាក់ផ្ទាល់ខ្លួនរបស់នរណាម្នាក់ឡើយ។ ប្រសិនបើលោកផ្ទេរប្រាក់ទៅនរណាម្នាក់ ក៏ត្រូវតែផ្ទេរវាមកវិញដែរ។ ជាងនេះ លោកបានលើកឡើងពីការព្រួយបារម្ភថា ប្រសិនបើបញ្ហាកើតឡើងនាពេលអនាគត លោកសូមមិនពាក់ព័ន្ធទេ ដូច្នេះហើយទើបចង់ដកខ្លួនចេញពីមូលនិធិនោះដែរ។

គួរជម្រាបជូនដែរថា នាប៉ុន្មានថ្ងៃមកនេះមូលនិធិរបស់បុគ្គល Kan Jom Phalang បានរងនូវរឿងអាស្រូវបែងចែកគ្នា ដោយគ្រោងនឹង​ផ្លាស់​ប្តូរ​ទៅជា​មូលនិធិមួយផ្សេងទៀត។ ប៉ុន្តែ មេធាវីដ៏ល្បីល្បាញលោក Decha Kittiwittayanan បានអំពាវនាវឲ្យស្ថាប័ន​ពាក់ព័ន្ធ​ទាំងអស់ស៊ើបអង្កេត​លើ​មូលនិធិរបស់បុគ្គលនេះភ្លាមៗ ដោយលោក​ទទូច​ថា រឿងប្ដូរផ្លាស់នេះ គឺមានភាពស្រដៀងទៅនឹងអ្នកនយោបាយថៃជាច្រើន ដែលតែងតែប្រើអ្នកណាម្នាក់សម្រាប់លាងលុយកខ្វក់ ឬការគេចពន្ធឲ្យពួកគេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

មេធាវីថៃ ជំរុញ​ឲ្យ​​ស៊ើបអង្កេត​លើ​មូលនិធិ Jom Phalang អាចជាប់ពាក់ព័ន្ធ​លាងលុយកខ្វក់