ភរិយានាយករដ្ឋមន្រ្តីថៃ រងការរិះគន់ថាបានគំរាមអ្នកសារព័ត៌មាន

លោកស្រី Thananon Niramit ភរិយារបស់លោកនាយករដ្ឋមន្ត្រីថៃ  អានុទីន​ ឆានវីរៈគុល(Anutin Charnvirakul) កំពុងរងការរិះគន់យ៉ាងខ្លាំង បន្ទាប់ពីលោកស្រីបានស្ដីឲ្យអ្នកយកព័ត៌មានថា ពួកគេមានចិត្តអាក្រក់លើស្វាមីរបស់លោកស្រី ដោយការសួរសំណួរសួរចាក់ឬសចាក់គល់។ នេះបើយោងតាមការចេញផ្សាយរបស់កាសែត Bangkok Post នៅថ្ងៃទី៣០ខែតុលា។

រឿងនេះបានកើតឡើងនៅពេលដែលលោក Anutin បានត្រឡប់មកពីប្រទេសម៉ាឡេស៊ីវិញ ហើយត្រូវបានសួរសំណួររសើបចំនួនពីរ អំពីការកត់សម្គាល់របស់លោកពាក់ព័ន្ធថៃឈ្លានពានកម្ពុជា និងអំពីការអះអាងថា សមាជិកសភារដ្ឋាភិបាលម្នាក់ទទួលសំណូកពីក្រុមឆបោកតាមអ៊ីនធឺណិត។

បន្ទាប់ពីលោក Anutin បានបញ្ចប់ការសម្ភាស លោកស្រី Thananon បានញញឹម ហើយនិយាយទៅកាន់អ្នកយកព័ត៌មានថា «ហេតុអ្វីបានជាអ្នកមានចិត្តអាក្រក់ចំពោះនាយករដ្ឋមន្ត្រីយ៉ាងនេះ? លើកក្រោយខ្ញុំនឹងចងចាំ។ ការសួរនេះច្រើនពេកហើយ»។

លោកស្រី Pukkamon Nunarnan សមាជិកសភាប្រឆាំងមកពីគណបក្សប្រជាជន(People’s Party) បានចោទប្រកាន់លោកស្រី Thananon ពីបទគំរាមកំហែងដល់ប្រព័ន្ធផ្សព្វផ្សាយ។ ទោះបីជាសំឡេងរបស់លោកស្រី Thananon ហាក់ដូចជារួសរាយរាក់ទាក់ក៏ដោយ ក៏ពាក្យសម្ដីរបស់លោកស្រីអាចត្រូវបានគេមើលឃើញថាជាការព្រមានដល់អ្នកសារព័ត៌មាន ខណៈដែលអ្នកសារព័ត៌មានមានកាតព្វកិច្ចសួរសំណួរថ្នាក់ដឹកនាំដើម្បីផលប្រយោជន៍សាធារណៈ។

លើសពីនេះលោកស្រី Pukkamon បាននិយាយថា អ្នកយកព័ត៌មានមានកាតព្វកិច្ចសួរសំណួរពិបាកៗ ហើយប្រសិនបើនាយករដ្ឋមន្ត្រីមានបញ្ហាជាមួយរឿងនោះ លោកគួរតែដោះស្រាយវាដោយខ្លួនឯង ជំនួសឱ្យការអនុញ្ញាតឱ្យភរិយារបស់លោកនិយាយជំនួសបែបនេះទេ៕

អត្ថបទ៖ ប៊ុន សុភាព