សេដ្ឋកិច្ច

កម្ពុជានាំចេញដំណាប់ស្វាយក្រៀមទៅកាន់ទីផ្សារអូស្ត្រាលីលើកដំបូង ២០ តោន

បានផុស

៦ ខែ មុន

នៅ

ថ្ងៃអាទិត្យ ៩ វិច្ឆិកា ២០២៥

ដោយ

ស្ថានទូតអូស្ត្រាលី និងក្រុមហ៊ុន ផលិតផលចំណីអាហារគិរីរម្យ (Kirirom Food Production Co., Ltd. (KFP) សម្រេចបានជោគជ័យក្នុងការនាំចេញនូវដំណាប់ស្វាយក្រៀមធម្មជាតិចំនួន ២០ តោន លើកដំបូង ទៅកាន់ទីផ្សារប្រទេសអូស្ត្រាលី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមិទ្ធផលដ៏គួរឲ្យកត់សម្គាល់នេះ ត្រូវបានសម្រេចទៅបានដោយមានការគាំទ្រពីកម្មវិធីភាពជាដៃគូកម្ពុជា-អូស្ត្រាលី ដើម្បីការអភិវឌ្ឍសេដ្ឋកិច្ចប្រកបដោយភាពធន់ (CAPRED) ដែលបានគូសបញ្ជាក់ពីកិច្ចសហប្រតិបត្តិការដែលកំពុងរីកចម្រើនរវាងប្រទេសទាំងពីរ ក្នុងការលើកកម្ពស់កំណើនសេដ្ឋកិច្ចប្រកបដោយចីរភាព និងបរិយាប័ន្ន។

តាមរយៈជំនួយរបស់ CAPRED ក្រុមហ៊ុន KFP បានបង្កើនការត្រៀមលក្ខណៈសម្រាប់ការនាំចេញរបស់ខ្លួន និងបានកសាងទំនាក់ទំនងធុរកិច្ចដ៏រឹងមាំជាមួយដៃគូនៅក្នុងប្រទេសអូស្ត្រាលី និងទីផ្សារអន្តរជាតិផ្សេងទៀត។ គំនិតផ្តួចផ្តើមនេះគឺជាផ្នែកមួយនៃការខិតខំប្រឹងប្រែងកាន់តែទូលំទូលាយរបស់អូស្ត្រាលី ដើម្បីពង្រឹងខ្សែសង្វាក់តម្លៃកសិកម្មរបស់កម្ពុជា និងពង្រីកលទ្ធភាពទទួលបានទីផ្សារសម្រាប់ សហគ្រាសធុនតូច និងមធ្យម (SMEs)។

ក្នុងអំឡុងពេលនៃការចុះត្រួតពិនិត្យប្រតិបត្តិការរបស់ក្រុមហ៊ុន KFP នាពេលថ្មីៗនេះ តំណាងទាំងនោះបានកត់សម្គាល់ពីរបៀបដែលការកែច្នៃកសិផលដើរតួនាទីយ៉ាងសំខាន់ក្នុងការជំរុញសេដ្ឋកិច្ចជនបទរបស់កម្ពុជា។

តំណាង CAPRED បានឱ្យដឹងថា កិច្ចខិតខំប្រឹងប្រែងរបស់យើងក្នុងការពង្រីកលទ្ធភាពទីផ្សារសម្រាប់ SMEs មិនត្រឹមតែបង្កើតការងារប៉ុណ្ណោះទេ ថែមទាំងជួយកែលម្អជីវភាពរស់នៅទៀតផង។ ការធ្វើការជាមួយ KFP ផ្តល់ឱ្យពួកគេនូវទីផ្សារធានាបាននូវតម្លៃសមរម្យ។ ទំនុកចិត្តនេះអនុញ្ញាតឱ្យពួកគេវិនិយោគលើគុណភាព និងផ្គត់ផ្គង់ទាន់ពេលវេលា។

យោងតាមក្រសួងពាណិជ្ជកម្ម កម្ពុជារកចំណូលបាន ១០៨ លានដុល្លារ ពីការនាំចេញផ្លែស្វាយស្រស់ ប្រមាណជាង ២០ ម៉ឺនតោន នៅក្នុងរយៈពេល ៩ ខែ ឆ្នាំ ២០២៥ កើនឡើង ២,៦៣% ធៀបនឹងរយៈពេលដូចគ្នាកាលពីឆ្នាំមុន។

លោក ងិន ឆាយ អគ្គនាយក នៃអគ្គនាយកដ្ឋានកសិកម្ម មានប្រសាសន៍ថា ការនាំចេញផ្លែស្វាយស្រស់បានថយចុះ ដោយសាររោងចក្រដំណាប់ស្វាយក្នុងស្រុកបានប្រមូលទិញផ្លែស្វាយស្រស់មកកែច្នៃជាដំណាប់ស្វាយដើម្បីនាំចេញទៅទីផ្សារក្រៅប្រទេស៕