ព័ត៌មានជាតិ

រដ្ឋមន្ត្រីការបរទេសកូរ៉េខាងត្បូងផ្ដើមទស្សនកិច្ចនៅកម្ពុជា ជាបេសកកម្មផ្ដោតលើការបង្ក្រាបបទល្មើសឆបោកតាមអនឡាញ

បានផុស

៦ ខែ មុន

នៅ

ថ្ងៃចន្ទ ១០ វិច្ឆិកា ២០២៥

ដោយ

រដ្ឋមន្ត្រីការបរទេសកូរ៉េខាងត្បូងលោក Cho Hyun បានចាប់ផ្ដើមដំណើរទស្សនកិច្ចនៅកម្ពុជា នៅព្រឹកថ្ងៃចន្ទ នេះ បន្ទាប់ពីមកដល់កម្ពុជានៅយប់ថ្ងៃទី៩ ខែវិច្ឆិកា។ លោក Cho Hyun ចាប់ផ្ដើមជួបសម្តែងការគួរសម និងពិភាក្សាការងារជាមួយ សម្ដេចមហាបវធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅវិមានសន្តិភាព នាព្រឹកថ្ងៃទី១០ ខែវិច្ឆិកា នេះ។

មិនទាន់មានសេចក្ដីលម្អិតណាមួយអំពីគោលបំណងនៃជំនួបពិភាក្សាការងារពីខាងរាជរដ្ឋាភិបាលកម្ពុជាឡើយ ប៉ុន្តែបើតាមសេចក្ដីរាយការណ៍របស់សារព័ត៌មានកូរ៉េ ដំណើររបស់រដ្ឋមន្ត្រីការបរទេសកូរ៉េខាងត្បូងមកកម្ពុជា ក្នុងបំណងដើម្បីពិភាក្សាលើកិច្ចសហការរវាងប្រទេសកូរ៉េ និងកម្ពុជាក្នុងការចាប់ផ្ដើមសកម្មភាពរួមគ្នាឱ្យបានឆាប់ប្រឆាំងនឹងឧក្រិដ្ឋកម្មឆបោកតាមអនឡាញនៅកម្ពុជា។

តាមការចុះផ្សាយរបស់សារព័ត៌មានកូរ៉េ ដោយស្រង់សម្ដីអ្នកនាំពាក្យក្រសួងការបរទេសកូរ៉េ Lee Jae-wo គឺ កម្ពុជា និងកូរ៉េ ក៏កំពុងរៀបចំអនុស្សរណៈនៃការយោគយល់គ្នាមួយលើការងារប្រឆាំងបទល្មើសអនឡាញនេះផងដែរ។

គួរកត់សម្គាល់ថា ដំណើរទស្សនកិច្ចនេះ កើតមានឡើងក្រោយពីករណីនៃការធ្វើទារុណកម្មដោយជនជាតិចិនរហូតដល់ស្លាប់និស្សិតកូរ៉េម្នាក់នៅក្រុងបូកគោ ខេត្តកំពត កាលពីខែសីហា និងបានផ្ទុះព័ត៌មាននៅខែតុលា បានធ្វើឱ្យប្រទេសកូរ៉េខាងត្បូងប្រតិកម្មជាបន្តបន្ទាប់រហូតដល់តំបន់ខ្លះនៃកម្ពុជាជាតំបន់ហាមប្រាមកម្រិតខ្ពស់ថែមទៀតផង។

នៅមុនដំណើរទស្សនកិច្ចរបស់លោក Cho Hyun មកកាន់កម្ពុជានាពេលនេះ, អនុរដ្ឋមន្ត្រីទី២ នៃក្រសួងការបរទេសកូរ៉េ លោកស្រី គីម ជីណា ក៏ធ្លាប់បានបំពេញទស្សនកិច្ចនៅកម្ពុជា ដោយ ជជែកលើបញ្ហាបទល្មើសឆបោកតាមអនអនឡាញជាមួយនាយករដ្ឋមន្ត្រីកម្ពុជា, មន្ត្រីជាន់ខ្ពស់ក្រសួងការបរទេស, រដ្ឋមន្ត្រីមហាផ្ទៃ និងអាជ្ញាធរជំនាញ និងបានចុះទៅខេត្តតាកែវជាដើម។

នៅថ្ងៃចុងក្រោយនៃដំណើរទស្សនកិច្ចរបស់លោកស្រី គីម ជីណា នៅកម្ពុជា កាលពីថ្ងៃទី១៦ ខែតុលា សមត្ថកិច្ចកម្ពុជា ក៏បានចាប់បញ្ជូនជនជាតិកូរ៉េខាងត្បូងដែលពាក់ព័ន្ធនឹងបទល្មើសឆបោកតាមប្រព័ន្ធបច្ចេកវិទ្យាចំនួន៦៤នាក់ ដាក់តាមជើងហោះហើរពិសេសបញ្ចូនទៅប្រទេសកំណើតវិញផងដែរ។

កាលពីចុងខែតុលា កន្លងទៅនេះ នាយករដ្ឋមន្ត្រីកម្ពុជា និងប្រធានាធិបតីកូរ៉េ ក៏បានជួបគ្នានៅក្រៅកិច្ចប្រជុំកំពូលអាស៊ាននៅម៉ាឡេស៊ី ជជែកពីបញ្ហាឆបោកតាមអនឡាញ និងអំពីក្រុមការងារចំពោះកិច្ចប្រយុទ្ធប្រឆាំងបទល្មើសឆបោកតាមប្រព័ន្ធអនឡាញដែលដំណើរការនៅខែវិច្ឆិកានេះ។ ក្នុងជំនួបនោះ ប្រធានាធិបតីកូរ៉េខាងត្បូងអះអាងថា បញ្ហាឧក្រិដ្ឋកម្មសាយប័រ ការឆបោកតាមប្រព័ន្ធបច្ចេកវិទ្យាមិនអាចរាំងស្ទះដល់ទំនាក់ទំនងកម្ពុជា នឹងកូរ៉េបានឡើយ៕