Zhao Lusi ចាកចេញពីភ្នាក់ងារចាស់ ក្រោមហេតុផល «ដោះដូរសេរីភាព»

តារាសម្តែងចិនដ៏ល្បីល្បាញ Zhao Lusi បានប្រែក្លាយការប្រគំតន្ត្រីខួបកំណើតផ្ទាល់ខ្លួន កាលពីថ្ងៃទី៨ ខែវិច្ឆិកា ទៅជាការអបអរសាទរនៅក្នុងការចាប់ផ្តើមនៃជីវិតថ្មីមួយ។ បន្ទាប់ពីប្រកាសជាផ្លូវការអំពីការបញ្ចប់កិច្ចសន្យាជាមួយភ្នាក់ងារចាស់ តារាស្រីបានបង្ហាញពីការពិតនៅពីក្រោយការតស៊ូ ដើម្បីឯករាជ្យនិងសេរីភាព នៅក្នុងឧស្សាហកម្មកម្សាន្តមួយនេះ។

នៅក្នុងព្រឹត្តិការណ៍ខួបកំណើតនោះ តារាស្រីវ័យក្មេងបានបង្ហាញខ្លួនពីលើឆាកអមដោយការអបអរសាទរពីអ្នកគាំទ្រ និងបរិយាកាសកក់ក្តៅ។ ភ្លាមៗនោះ ការទះដៃបានប្រែក្លាយទៅជាស្ងាត់ស្ងៀម ខណៈពេលដែលនាងនិយាយទាំងទឹកភ្នែកថា «ពីរខែមុន ខ្ញុំពិតជាគិតថាខ្ញុំមិនអាចសម្តែងបានទៀតទេ។ ប៉ុន្តែឥឡូវនេះ» ខ្ញុំសប្បាយចិត្តណាស់។ ទោះបីជាខ្ញុំនៅតែឈឺក៏ដោយ ខ្ញុំនៅតែអាចធ្វើអ្វីដែលខ្ញុំស្រឡាញ់»។

តួចិនរូបនេះនៅតែបន្តនិយាយទាំងសំឡេងញ័រទៀតថា «សូមអរគុណដល់ស្ទូឌីយោថ្មីរបស់យើង សូមអរគុណដល់ក្រុមហ៊ុនថ្មីរបស់យើង សូមអរគុណច្រើន» នាងបាននិយាយ ដោយបញ្ជាក់យ៉ាងច្បាស់ថានាងបានបញ្ចប់ទំនាក់ទំនងរបស់នាងជាមួយភ្នាក់ងារចាស់របស់នាងជាផ្លូវការ។

ពាក្យសម្ដីស្មោះត្រង់ និងរំជួលចិត្តរបស់នាង បានធ្វើឲ្យទស្សនិកជនចាប់អារម្មណ៍សឹងមិននឹកស្មានថាប៉ុន្មានមកនេះ Zhao Lusi លាក់ភាពឈឺចាប់នេះជាយូរណាស់មកហើយ។ នៅពីក្រោយស្នាមញញឹមនៅយប់នោះ គឺជាពេលវេលាដ៏លំបាកដែលរូបនាងបានប្រឈមមុខក្នុងរយៈពេលប៉ុន្មានខែកន្លងមកនេះ។ ប្រភពមួយបានបង្ហាញថា នាងបានទទួលការព្យាបាលវេជ្ជសាស្រ្តដ៏យូរ និងបានបញ្ឈប់សកម្មភាពផ្សព្វផ្សាយទាំងអស់ ចំពេលមានជម្លោះកិច្ចសន្យាជាមួយភ្នាក់ងារចាស់។ ជម្លោះនេះពាក់ព័ន្ធនឹង សិទ្ធិសម្រេចចិត្តលើការងារ រូបភាពសិល្បករ និង សេរីភាពវិជ្ជាជីវៈ។

ដូច្នេះការសម្រេចចិត្តនេះមិនមែនជារឿងងាយស្រួលនោះទេ។ Zhao Lusi ត្រូវលះបង់ក្រុមចាស់ ស្ថិរភាពអាជីពរបស់នាង និងប្រឈមមុខនឹងសម្ពាធសង្គម ជាថ្នូរនឹងរឿងមួយដែលនាងចង់បានបំផុត «សេរីភាពក្នុងការធ្វើជាខ្លួនឯងម្តងទៀត»។

ទោះជាយ៉ាងណាក៏ដោយ បន្ទាប់ពីប្រកាសពីការបែកគ្នា Zhao Lusi បានបង្កើតជាផ្លូវការនូវឈ្មោះ «Zhao Lusi Studio» ដែលជាស្ទូឌីយោមួយដែលនាងនឹងគ្រប់គ្រងដោយខ្លួនឯងទាំងស្រុង រួមទាំងការជ្រើសរើសស្គ្រីប ការរៀបចំរូបភាព និងការទំនាក់ទំនងរបស់អ្នកគាំទ្រ។ ការចាប់ផ្តើមថ្មីនេះបានផ្តល់ឲ្យនាងនូវអំណាចសម្រេចចិត្តកាន់តែច្រើន ហើយអាចបង្កើតស្នាដៃដែលឆ្លុះបញ្ចាំងពីអត្តសញ្ញាណដោយសេរី។

សម្រាប់អ្នកគាំទ្រ យប់នោះមិនមែនគ្រាន់តែជាការប្រគំតន្ត្រីខួបកំណើតនោះទេ ប៉ុន្តែវាក៏ជា ការប្រកាសពីការកើតជាថ្មី សម្រាប់ Zhao Lusi ដែលជាស្ត្រីម្នាក់ដែលបានជ្រើសរើសមិនចុះចាញ់នឹងប្រព័ន្ធនេះ ប៉ុន្តែផ្ទុយទៅវិញបានក្រោកឈរឡើងជាសិល្បករម្នាក់ដែលអាចគ្រប់គ្រងជីវិតរបស់នាងម្តងទៀត។

សំឡេងទះដៃអបអរសាទរយ៉ាងខ្លាំងនៅចុងបញ្ចប់នៃព្រឹត្តិការណ៍នេះគឺជាការឆ្លើយតបយ៉ាងច្បាស់ពីអ្នកគាំទ្រទូទាំងសាល ដោយបញ្ជាក់ថា ពួកគេបានត្រៀមខ្លួនរួចជាស្រេចដើម្បីឈរនៅក្បែរនាងគ្រប់ជំហានទាំងអស់។ ពីព្រោះថ្ងៃនេះ Zhao Lusi មិនត្រឹមតែបានត្រឡប់មកវិញទេ។ ប៉ុន្តែបានត្រឡប់មកវិញជាមួយនឹងអំណាចផ្ទាល់ខ្លួនរបស់នាង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ពាក្យចចាមអារ៉ាម Kris Wu ស្លាប់ក្នុងពន្ធនាគារ នៅតែមិនទាន់បញ្ជាក់ផ្លូវការនូវឡើយ