សេដ្ឋកិច្ច

អ្នកឧកញ៉ា គិត ម៉េង អំពាវនាវឱ្យគយ ពន្លឿនឯកសារដើម្បីសម្រួលដល់ការនាំចេញ-ចូល

បានផុស

៥ ខែ មុន

នៅ

ថ្ងៃចន្ទ ១៧ វិច្ឆិកា ២០២៥

ដោយ

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានអំពាវនាវដល់អគ្គនាយកដ្ឋានគយ និងរដ្ឋាករកម្ពុជា ជាពិសេសមន្ត្រីគយនៅតាមមាត់ច្រក ត្រូវធ្វើយ៉ាងណាសម្រួលនីតិវិធីបែបបទឯកសារឱ្យបានលឿន រហ័ស និងមានប្រសិទ្ធិភាព ដើម្បីបង្ករភាពងាយស្រួលបន្ថែមទៀតដល់ការនាំចេញ-នាំចូលរបស់ផ្នែកឯកឯកជនដែលជាវិនិយោគិន។

អ្នកឧកញ៉ា គិត ម៉េង បានលើកឡើងនៅក្នុងពិធីវេទិកាគយកម្ពុជា លើកទី៣ ក្រោមមូលបទ “រដ្ឋបាលគយក្នុងបរិបទបច្ចេកវិទ្យាឌីជីថល” នៅថ្ងៃទី ១៤ ខែវិច្ឆិកា ឆ្នាំ ២០២៥។

អ្នកឧកញ៉ា ក៏បានកោតសរសើរ អគ្គនាយកដ្ឋានគយ និងរដ្ឋាករកម្ពុជា មានការរីកចម្រើនយ៉ាងខ្លាំង និងបានធ្វើការកែសម្រួល និងសាមញ្ញកម្មនីតិវិធីគយយ៉ាងច្រើន ក្នុងន័យបង្កើតបរិយាកាសងាយស្រួលដល់អ្នកវិនិយោគិនក្នុងការធ្វើប្រិតបត្តិការនាំចេញ នាំចូលរបស់ខ្លួន។

អ្នកឧកញ៉ាបានអំពាវនាវដល់អគ្គនាយកដ្ឋានគយ និងរដ្ឋាករកម្ពុជា ជាពិសេសមន្ត្រីគយនៅតាមមាត់ច្រក ត្រូវធ្វើយ៉ាងណាសម្រួលនីតិវិធីបែបបទឯកសារឱ្យបានលឿន រហ័ស និងមានប្រសិទ្ធិភាព ដើម្បីបង្ករភាពងាយស្រួលបន្ថែមទៀតដល់ការនាំចេញ នាំចូលរបស់ផ្នែកឯកឯកជនដែលជាវិនិយោគិន និងស្នើសុំឱ្យផ្នែកឯកជនខ្លួនឯងផ្ទាល់ត្រូវមានការយកចិត្តទុកដាក់ និងធ្វើការសហការគ្នាឱ្យបានល្អជាមួយនឹងមន្ត្រីគយ ក្នុងន័យបង្កើនប្រសិទ្ធិភាពនាំចេញ នាំចូល ធ្វើយ៉ាងណាជួយដល់ប្រទេសជាតិឱ្យបានរីកចម្រើន។

លោក គុណ ញឹម រដ្ឋមន្ត្រី ប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ពីសារៈសំខាន់នៃកម្មវិធីនេះ ដែលជាយន្តការបញ្ជ្រាបការយល់ដឹងបន្ថែមអំពីនីតិវិធីគយ និងបង្កើនកិច្ចសហការរវាងរដ្ឋបាលគយ និងផ្នែកឯកជន ដើម្បីរួមគ្នាលើកស្ទួយវប្បធម៌ការបង់ពន្ធ និងកិច្ចសម្រួលពាណិជ្ជកម្មនៅកម្ពុជា។

លោក គុណ ញឹមបន្ថែមថា៖ «ទិសដៅក្លាយជារដ្ឋបាលគយឌីជីថល គឺជាការចាំបាច់ដែលអគ្គនាយកដ្ឋានគយ និងរដ្ឋាករកម្ពុជាបាននិងកំពុងជំរុញអនុវត្តឱ្យបានជោគជ័យ ដើម្បីលើកកម្ពស់ប្រសិទ្ធភាព តម្លាភាព គណនេយ្យភាព និងភាពជឿទុកចិត្តពីគ្រប់ភាគីពាក់ព័ន្ធ។

លោករដ្ឋមន្ត្រីប្រតិភូបានសង្ខេបអំពីវឌ្ឍនភាពសំខាន់ៗ របស់អគ្គនាយកដ្ឋានគយ និងរដ្ឋាករកម្ពុជានាពេលថ្មីៗនេះ លើការធ្វើបរិវត្តកម្មឌីជីថលនីតិវិធីគយ និងការផ្តល់សេវាសាធារណៈ និងការអនុវត្តវិធានការចំនួន ១៤ចំណុច ពាក់ព័ន្ធនឹងកិច្ចសម្រួលពាណិជ្ជកម្មក្រោមដែនសមត្ថកិច្ចគយ ដែលសម្ដេចធិបតីនាយករដ្ឋមន្ត្រី បានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩៕