លោក Erdogan ជំរុញឲ្យរុស្ស៊ីនិងអ៊ុយក្រែនបន្តកិច្ចចរចានៅអ៊ីស្តង់ប៊ូល

ប្រធានាធិបតីតួកគី លោក Recep Tayyip Erdogan កាលពីថ្ងៃពុធទី​១៩​ខែ​វិច្ឆិកា​ឆ្នាំ​២០២៥​ បានជំរុញ​ឲ្យ​ប្រទេសរុស្ស៊ី និងអ៊ុយក្រែនចាប់ផ្តើមការចរចាឡើងវិញនៅទីក្រុងអ៊ីស្តង់ប៊ូល ដោយ​និយាយ​ថា ចំនួនអ្នកស្លាប់ក្នុងចំណោមជនស៊ីវិល​កំពុងកើនឡើង និងការវាយប្រហារថ្មីៗនេះទៅលើហេដ្ឋារចនាសម្ព័ន្ធអ៊ុយក្រែនបានបញ្ជាក់យ៉ាង​ច្បាស់​ពីតម្រូវការសម្រាប់ការទូតជាថ្មី។

យោង​តាម​ Turkish Minute ថ្លែងជាមួយប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី នៅទីក្រុងអង់ការ៉ា លោក Erdogan បាន​លើក​ឡើង​ថា តួកគីមានគោលបំណងធ្វើ​ឲ្យ​«ដំណើរការអ៊ីស្តង់ប៊ូល»រស់ឡើងវិញ ​ដែល​ធ្លាប់​ធ្វើជាម្ចាស់ផ្ទះនៃការចរចាបីជុំរវាងគណៈប្រតិភូរុស្ស៊ីនិងអ៊ុយក្រែនចាប់ពីខែឧសភាដល់ខែកក្កដា។

លោក Erdogan បាន​និយាយ​ថា «យើងបានគូសបញ្ជាក់ពីតម្រូវការក្នុងការបន្តដំណើរការអ៊ីស្តង់ប៊ូលជាមួយនឹងវិធីសាស្រ្តជាក់ស្តែងដែលមានគោលដៅសម្រាប់លទ្ធផល។ យើងរំពឹងថា ដៃគូទាំងអស់ដែលចង់ឲ្យ​ការបង្ហូរឈាមបញ្ចប់នឹងគាំទ្រដំណើរការនេះ»។

តួកគីបានរក្សាកិច្ច​សន្ទនា​ទាំង​ជាមួយ​ទីក្រុងមូស្គូ និងទីក្រុងកៀវ​ចាប់តាំងពីការឈ្លានពានរបស់រុស្ស៊ីនៅឆ្នាំ​២០២២ ហើយបានដាក់ខ្លួនជាអ្នកសម្របសម្រួល។ កិច្ចចរចាកន្លងមកនៅទីក្រុងអ៊ីស្តង់ប៊ូល បានជួយសម្រួលដល់ការដោះដូរអ្នកទោស និងការប្រគល់​សាកសព​ទាហាន ទោះបីជាពួកគេបរាជ័យក្នុងការឈានដល់បទឈប់បាញ់ក៏ដោយ។

លោក Erdogan បានលើកឡើងពីការវាយប្រហារថ្មីៗរបស់រុស្ស៊ីទៅលើទីក្រុងអ៊ុយក្រែន រួមទាំងការវាយប្រហារលើគ្រឿងបរិក្ខារអគ្គិសនី ជាភស្តុតាងដែលថា ការទូតត្រូវតែចាប់ផ្តើមឡើងវិញ។ លោកបាន​រៀបរាប់​ថា «ការវាយប្រហារដែលកំពុងកើនឡើងលើហេដ្ឋារចនាសម្ព័ន្ធថាមពល និងការបាត់បង់ជីវិតបានបង្ក​ឲ្យ​មានការបំផ្លិចបំផ្លាញសម្រាប់ភាគីទាំងពីរ»។

លោកបានបន្ថែមថា តួកគីបើកចំហចំពោះសំណើពីប្រទេសរុស្ស៊ីដែលអាចត្រួសត្រាយផ្លូវសម្រាប់បទឈប់បាញ់ ឬដំណោះស្រាយទូលំទូលាយជាងនេះ ហើយបាននិយាយថា ការចូលរួមរបស់សហរដ្ឋអាមេរិកអាចជួយ​បង្កើន​ប្រសិទ្ធភាព​រឹតតែ​ខ្លាំង។

ដំណើរទស្សនកិច្ចរបស់លោកហ្សេលេនស្គី បានធ្វើឡើងប៉ុន្មានម៉ោងបន្ទាប់ពីការវាយប្រហាររបស់រុស្ស៊ីបានសម្លាប់មនុស្សយ៉ាងតិច២៥នា​ក់នៅភាគខាងលិចអ៊ុយក្រែន ដែលបង្កើនភាពបន្ទាន់ដល់ការជំរុញរបស់លោកសម្រាប់ការចូលរួមអន្តរជាតិជាថ្មី៕

ប្រែសម្រួល៖ ឈាង