អតីតមេគុកក្រុងបាងកក ត្រូវស៊ើបអង្កេត ព្រោះបើកដៃឲ្យតារាម៉ូដែល ចូលលេងកម្សាន្តជាមួយអ្នកទោសចិន 

នាយកដ្ឋានពន្ធនាគារថៃ បានតែងតាំងគណៈកម្មាធិការមួយដើម្បីស៊ើបអង្កេត អតីតមេគុកក្រុងបាងកក ពាក់ព័ន្ធរឿងអាស្រូវពុករលួយដែលបើកដៃឲ្យអ្នកទោសជាជនជាតិចិនទទួលបានសិទ្ធិពិសេស មានតារាម៉ូដែលស្អាតៗមកកំដរកម្សាន្តសប្បាយជាប្រចាំនៅក្នុងគុក VIP។

តាមការផ្សាយរបស់ Amarin កាលពីថ្ងៃព្រហស្បតិ៍ទី២០ខែវិច្ឆិកាឆ្នាំ២០២៥ ក្រសួងយុត្តិធម៌រកឃើញថា លោក Manop Chomchuen បានធ្វើខុសតួនាទី ពាក់ព័ន្ធសកម្មភាពល្មើសច្បាប់របស់អ្នកទោសចិន។

ការស៊ើបអង្កេតបឋមបង្ហាញថា អ្នកទោសជនជាតិចិនមួយចំនួនបាន បានប្រើឥទ្ធិពលលើអ្នកទោសដទៃទៀតនៅក្នុងពន្ធនាគារ បណ្តាលឲ្យអ្នកទោសថៃមិនពេញចិត្ត។ នេះហើយជាហេតុផលដែលនាំឲ្យមានការលេចធ្លាយព័ត៌មាន ទៅកាន់នាយកដ្ឋានពន្ធនាគារ។

ជាលទ្ធផល មន្ត្រី ផ្នែកវិទ្យាសាស្ត្រកែប្រែ, ផ្នែកគ្រប់គ្រងធនធានមនុស្ស និងក្រុមវិន័យមន្ត្រី ត្រូវបានចាត់តាំងឲ្យបើកការស៊ើបអង្កេតស៊ីជម្រៅ។

ថ្មីៗនេះ អគ្គនាយកនាយកដ្ឋានពន្ធនាគារ បានបញ្ជូនក្រុមការងារពិសេស ដើម្បីឆ្មក់ចូលនិងឆែកឆេរគុកដោយរកឃើញ ឧបករណ៍អគ្គិសនីនិងបរិក្ខារជាច្រើន នៅកន្លែងឃុំឃាំងអ្នកទោសជនជាតិចិនចំនួន៣កន្លែង។​ វត្ថុហាមឃាត់រួមមានកាំបិតនិងដែកកេះ ក៏ត្រូវបានរកឃើញផងដែរ។

ដូច្នេះហើយ មេគុកត្រូវបានដកតំណែងរង់ចាំការស៊ើបអង្កេតជាបន្ត ខណៈនាយកដ្ឋានពន្ធនាគារក៏បានបញ្ជាឲ្យផ្ទេរឆ្មាំគុក១៤នាក់ ចេញផងដែរ៕

អត្ថបទ៖ សុខ សុវណ្ណ