ជនជាតិថៃមួយក្រុម ព្រួតគ្នាវាយទេសចររុស្ស៊ី ​បែកក្បាលឈាមហូរស្រោចពេញខ្លួន នៅ ប៉ាតាយ៉ា

នៅប្រទេសថៃ កើតមានហេតុការណ៍វាយទេសចរបរទេសទៀតហើយ ដោយលើកនេះជនជាតិរុស្ស៊ីម្នាក់ បានរងរបួសធ្ងន់ ឈាមហូរស្រោចពេញខ្លួនក្នុងទីក្រុង ប៉ាតាយ៉ា។

តាមការផ្សាយរបស់ Pattaya​ News, ទេសចរអាយុ២៧ឆ្នាំរូបនេះត្រូវបុរសថៃមួយក្រុម ព្រួតវាយនិងយកដបវាយក្បាលបណ្តាលឲ្យរយះ ហូរឈាម ខណៈអ្នកបង្ករត់បាត់ស្រមោលពីកន្លែងកើតហេតុ។  

ហេតុការណ៍នេះកើតឡើងនាវេលាម៉ោង ៣:៥០នាទីទាបភ្លឺថ្ងៃព្រហស្បតិ៍ទី២០ខែវិច្ឆិកាឆ្នាំ២០២៥ នៅតំបន់ Walking Street ភាគខាងត្បូងទីក្រុងប៉ាតាយ៉ា។

យ៉ាងណា មិនទាន់ដឹងពីមូលហេតុនៃករណីនេះឡើយ ខណៈប៉ូលិសកំពុងបើកការស៊ើបអង្កេតជាបន្ត។

មិនមែនជារឿងថ្មីឡើយ ដែលជនជាតិថៃ វាយធ្វើបាបទេសចរបរទេស ពោលគឺករណីបែបនេះ កើតឡើងញឹកញាប់ណាស់ក្នុងប្រទេសថៃ។

ករណីល្បីបំផុតនាពេលថ្មីៗនេះ គឺពាក់ព័ន្ធទេសចរម៉ាឡេស៊ី២នាក់ជាគូស្នេហ៍នឹងគ្នា ដែលត្រូវបុរសគ្មានការងារធ្វើម្នាក់វាយនិងដុតពួកគេទាំងរស់នៅជិតផ្សារទំនើបមួយលើផ្លូវ Ratchadamri ក្នុងទីក្រុងបាងកក កាលពីរាត្រីថ្ងៃព្រហស្បតិ៍ទី៧ខែសីហាឆ្នាំ២០២៥។

ហេតុការណ៍នោះ ធ្វើឲ្យទេសចរបរទេសកាន់តែខ្លាចរអានឹងការទៅលេងកម្សាន្តនៅថៃ ដោយសារតែប្រជាជនប្រទេសនោះ មិនសូវរាក់ទាក់និងខ្លះមានចរិតកោងកាច ហើយអ្វីដែលកាន់តែភ័យខ្លាចនោះគឺថា នៅថៃ តែងតែកើតមានករណីប្រើអំពើហិង្សាលើជនបរទេស ពីសំណាក់ម្ចាស់ស្រុកផ្ទាល់៕

អត្ថបទ៖ សុខ សុវណ្ណ