អ្នកជេរប្រមាថស្ត្រីនៅខេត្តតាកែវលើគណនីហ្វេសប៊ុក ត្រូវបានឃាត់ខ្លួន និងកសាងសំណុំរឿងបញ្ជូនទៅតុលាការ

កម្លាំងនគរបាលនៃស្នងការដ្ឋាននគរបាលខេត្តតាកែវ កាលពីថ្ងៃទី៤ ខែធ្នូ ឆ្នាំ២០២៥ បានឃាត់ខ្លួនជនសង្ស័យម្នាក់ដែលបានប្រើប្រាស់គណនីហ្វេសប៊ុកឈ្មោះ ស្រី ឡូត បង្ហោះសារជេរប្រមាថលើស្ត្រីដោយប្រើពាក្យសម្ដីមិនសមរម្យប៉ះពាល់ដល់តម្លៃស្ត្រី។ ការឃាត់ខ្លួនម្ចាស់គណនីហ្វេសប៊ុកឈ្មោះ ស្រី ឡូត នេះ ធ្វើឡើងបន្ទាប់ពីមានផ្ទុះការប្រតិកម្មពីប្រជាពលរដ្ឋ មន្ត្រីរាជការ និងអាជ្ញាធរគ្រប់លំដាប់ថ្នាក់ ក្នុងខេត្តតាកែវ ក្រោយពីម្ចាស់គណនីហ្វេសប៊ុកនេះ បានបង្ហោះខ្លឹមសារជេរប្រមាថប៉ះពាល់កិត្តិយសស្រ្តីនៅខេត្តតាកែវ នាពេលថ្មីៗកន្លងទៅនេះ។

តាមរបាយការណ៍របស់ស្នងការដ្ឋាននគរបាលខេត្តតាកែវ ជនសង្ស័យមានឈ្មោះ មាន សង្ហារ ភេទប្រុស អាយុ២០ឆ្នាំ មុខរបរកម្មកររោងចក្រផលិតកាបូប នៅចោមចៅ រាជធានីភ្នំពេញ។

តាមចម្លើយសារភាពដែលនាំឲ្យបុគ្គលរូបនេះបង្ហោះខ្លឹមសារបែបនេះ ដោយសាររូបគេខឹងប្រពន្ធរបស់ខ្លួនឈ្មោះ ស្រី ឡូត ដែលបានបំបែកបំបាក់នារីជាសង្សាររបស់ខ្លួនដែលរស់នៅខេត្តតាកែវ មុខរបរលក់អនឡាញ ក្នុងគោលបំណងទម្លាក់កំហុសឱ្យប្រពន្ធទទួលខុសត្រូវចំពោះមុខច្បាប់ និងខឹងសង្សារថ្មីបដិសេដឈប់ស្រឡាញ់ខ្លួន។

ក្រោយពីសួរនាំ ជនសង្ស័យត្រូវបានកម្លាំងជំនាញនៃស្នងការខេត្តតាកែវ កសាងសំណុំរឿងបញ្ចូនទៅសាលាដំបូងខេត្ត ដើម្បីចាត់ការតាមនីតិវីធីផងដែរ។

សូមជម្រាសថា នៅលើគណនីហ្វេសប៊ុកឈ្មោះ ស្រី ឡូត កាលពីពេលថ្មីៗកន្លងទៅនេះបានបង្ហោះសារជេរប្រមាថលើស្ត្រីនៅខេត្តតាកែវ ដោយប្រើពាក្យសម្ដីមិនសមរម្យ ធ្វើឲ្យប៉ះពាល់ដល់កិត្តិយស សេចក្ដីថ្លៃថ្នូ និងតម្លៃស្ត្រីផងដែរ។ ក្រោយឃើញសារបង្ហោះនៅលើគណនីហ្វេសប៊ុកនេះ ប្រជាពលរដ្ឋជាច្រើនដែលសុទ្ធសឹងជាអ្នករស់នៅក្នុងខេត្តតាកែវបានបញ្ចេញមតិរិះគន់យ៉ាងខ្លាំងទៅលើសារបង្ហោះរបស់ម្ចាស់គណនីហ្វេសប៊ុកនេះ និងស្នើឲ្យអាជ្ញាធរចាត់វិធានការទៀតផង៕