ក្នុងសេណារីយ៉ូអាក្រក់បំផុត ការនាំចេញថៃអាចធ្លាក់ចុះដល់ – ៣,១% នៅឆ្នាំក្រោយ

ក្រសួងពាណិជ្ជកម្មថៃបាន​ព្យាករថា ការនាំចេញរបស់ថៃនៅឆ្នាំ ២០២៦ អាចមានចាប់ពីកំណើន ១,១% ក្នុងសេណារីយ៉ូល្អបំផុត និងធ្លាក់ចុះរហូតដល់ -៣,១% ក្នុងសេណារីយ៉ូអាក្រក់បំផុត ដោយហានិភ័យចម្បងគឺ​វិធានការពាណិជ្ជកម្មរបស់សហរដ្ឋអាមេរិក និងភាពខ្លាំងនៃប្រាក់បាត​។

តាមការចុះផ្សាយរបស់កាសែត The Nation នៅថ្ងៃអង្គារនេះ រដ្ឋមន្ត្រីក្រសួងពាណិជ្ជកម្ម លោកស្រី ស៊ូផាជី ស៊ូធមពុន (Suphajee Suthumpun) បានព្រមានថា ការនាំចេញ​ថៃ​ឆ្នាំក្រោយ​ ប្រឈមមុខនឹងហានិភ័យធ្លាក់ចុះយ៉ាងខ្លាំង ​ប្រសិនបើស្ថានភាពពិភពលោកកាន់តែយ៉ាប់យ៉ឺនទៅៗ ​ហើយ​ភាពតានតឹងពាណិជ្ជកម្មកើនឡើង។

ក្នុងសេណារីយ៉ូធម្មតា ការនាំចេញថៃ​អាចនឹងធ្លាក់ចុះប្រហែលដល់់ -១% មកនៅត្រឹម ៣៣០,៦ ប៊ីលាន​ដុល្លារ។ លោកស្រី ស៊ូផាជី បានពន្យល់ថា ដៃគូពាណិជ្ជកម្មជាច្រើនបានបង្កើនការទិញទំនិញ​ពីថៃនៅឆ្នាំនេះ ដើម្បី​បញ្ចៀសការដំឡើងពន្ធ​របស់អាមេរិក​ ដូច្នេះការបញ្ជាទិញនៅឆ្នាំ ២០២៦ ទំនងជានឹងធ្លាក់ចុះ ពីព្រោះពួកគេមានស្តុក​ច្រើន​រួចទៅហើយ។ ក្នុងពេលជាមួយគ្នានេះ សេដ្ឋកិច្ចពិភពលោក និងដៃគូពាណិជ្ជកម្មសំខាន់ៗ​ ក៏រំពឹងថានឹងថយចុះ ដែល​ស៊ីគ្នាទៅនឹង​ទស្សនវិស័យដែលខ្សោយសម្រាប់​​ពាណិជ្ជកម្ម​ពិភពលោក។

ក្នុងសេណារីយ៉៉ូអាក្រក់បំផុត ការនាំចេញអាចនឹងធ្លាក់ចុះដល់ – ៣,១% មកនៅត្រឹមប្រហែល ៣២៣,៦ ប៊ីលានដុល្លារអាមេរិក ប្រសិនបើរបាំងពាណិជ្ជកម្ម និងពន្ធគយរបស់សហរដ្ឋអាមេរិកកាន់តែធ្ងន់ធ្ងរទៅៗ និងរីករាលដាលជាងការរំពឹងទុក ដែលរំខានដល់ខ្សែ​ច្រវ៉ាក់ផ្គត់ផ្គង់សកល និង​ទម្លាក់ពាណិជ្ជកម្មពិភពលោក។

ការធ្លាក់ចុះយ៉ាងខ្លាំង​ក្នុងប្រទេស​មានសេដ្ឋកិច្ចធំៗ ជាពិសេសសហរដ្ឋអាមេរិក និងចិន នឹងបង្កើនសម្ពាធនេះ។ ក្នុងករណីនេះ ភាពខ្លាំងនៃប្រាក់បាត​នឹងប៉ះពាល់ដល់​ប្រាក់់ចំណេញ និងភាពប្រកួតប្រជែងរបស់អ្នកនាំចេញ ខណៈ​តម្លៃទំនិញទាបនឹងកាត់បន្ថយតម្លៃនាំចេញសរុបរបស់ប្រទេសថៃ។

ទោះបីជាយ៉ាងនេះក៏ដោយ លោកស្រីមិនបាន​លើកឡើងយ៉ាងណាទេថាតើជម្លោះព្រំដែនជាមួយ​កម្ពុជា ដែលបាន​តានតឹងជាថ្មីម្ដងទៀត​ឥឡូវនេះ នឹង​ប៉ះពាល់យ៉ាងណាដល់ប្រទេសថៃ។ កន្លងមក សេដ្ឋវិទូថៃបាន​លើកឡើងថា ប្រសិនបើបញ្ហាព្រំដែនអូសបន្លាយរយៈពេលយូរទៅមុខ ថៃប្រឈមមុខនឹង​ការ​ខាត​បង់​​ការនាំចេញទៅ​កម្ពុជាទាំងស្រុង​​នៅឆ្នាំ ២០២៦ ដែលមាន​ប្រមាណ ១៣០ ប៊ីលាន​បាត​ (​៤,០២ ប៊ីលាន​ដុល្លារ) ឬស្មើនឹង​ ១% នៃការនាំចេញសរុបរបស់ថៃ។ ការខាតបង់បែបនេះ កើតឡើងចំពេលដែលសេដ្ឋកិច្ចថៃដើរអូសជើង ចាញ់គូប្រជែងក្នុងតំបន់ រួចស្រាប់ទៅហើយ៕