អាវុធហត្ថរាជធានីភ្នំពេញ ឆ្មក់បង្ក្រាបក្មេងទំនើង បង្ហោះម៉ូតូលើផ្លូវសាធារណៈបាន០៦នាក់

កម្លាំងអាវុធហត្ថឃាត់ខ្លួន នឹងអប់រំក្មេងទំនើងមួយក្រុម ដែលធ្វើសកម្មភាពបង្ហោះម៉ូតូ បង្កភាពអនាធិបតេយ្យ បាត់បង់សណ្តាប់ធ្នាប់សាធារណៈបង្ហោះម៉ូតូតាមផ្លូវសាធារណៈ។

ប្រតិបត្តិការឃាត់ខ្លួននេះដែរបានធ្វើឡើងកាលពីវេលាម៉ោង ០៨យប់ ថ្ងៃទី១៤ ខែធ្នូ ឆ្នាំ២០២៥ នៅចំណុចផ្លូវបេតុង ក្បែរវត្តជើងឯក ស្ថិតក្នុងភូមិជើងឯក សង្កាត់ជើងឯក ខណ្ឌដង្កោ រាជធានីភំ្នពេញ។

តាមការបញ្ជាក់ពីអាវុធហត្ថរាជធានី បានអោយដឹងថា កម្លាំងបានធ្វើការល្បាតក្នុងមូលដ្ឋានខណ្ឌដង្កោ ស្របពេលមកដល់ចំណុចផ្លូវបេតុង កៀកវត្តជើងឯក កម្លាំងជំនាញបានប្រទះឃើញ ក្មេងទំនើងមួយក្រុម ដែលធ្វើសកម្មភាពបង្ហោះម៉ូតូ បង្កភាពអនាធិបតេយ្យ បាត់បង់សណ្តាប់ធ្នាប់តាមទីសាធារណៈ ភ្លាមៗ កម្លាំងកងរាជអាវុធហត្ថ បានឆ្មក់ស្ទាក់ បង្រ្កាបឃាត់បានក្មេងទំនើង ០៦នាក់ ដើម្បីសាកសួរបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយសាកសួរចប់ អាវុធហត្ថរាជធានី បានធ្វើការអប់រំ នឹងកិច្ចសន្យាបញ្ឈប់រាល់សកម្មភាពទំនើងដែលនាំឲ្យប៉ះពាល់ដល់ការសិក្សា បំផ្លាញទ្រព្យសម្បត្តិក៏ដូចជាកិត្តិយសគ្រួសារ ព្រមទាំងបង្ករការភ័យខ្លាចដល់អ្នកជុំវិញ បង្ករភាពអនាធិបតេយ្យក្នុងសង្គម។ ហើយចំពោះម៉ូតូ ០៣គ្រឿង គឺត្រូវដកហូតរក្សាទុក នៅអាវុធហត្ថខណ្ឌដង្កោសិន រយៈពេល ៣ខែក្រោយ ទើបអាចមកយកយ្រឡប់ទៅវិញបាន៕ អត្ថបទ ៖ រដ្ឋា