រដ្ឋមន្ត្រីក្រសួងកិច្ចការនារី អំពាវនាវឱ្យពលរដ្ឋជឿជាក់លើរដ្ឋាភិបាល និងរួមសាមគ្គីគ្នា ក្នុងស្មារតីជាតិខ្មែរតែមួយ

លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី អំពាវនាវឱ្យពលរដ្ឋក្នុង និងក្រៅប្រទេសជឿជាក់លើរដ្ឋាភិបាល និងរួមសាមគ្គីគ្នា ក្នុងស្មារតីជាតិខ្មែរតែមួយ។ ការអំពាវនាវនេះ ធ្វើឡើងក្នុងឱកាសលោកស្រី រួមជាមួយថ្នាក់ដឹកនាំ និងមន្រ្តីរាជការក្រសួងកិច្ចការនារី និងសមាគមសហគ្រិនស្ត្រី បាននាំយកអំណោយជាស្បៀងអាហារ និងសម្ភារៈប្រើប្រាស់មួយចំនួនដល់កងទ័ពនៅសមរភូមិជួរមុខ នៅថ្ងៃទី១៥ ខែធ្នូ ឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រីបានបញ្ជាក់ថា ក្នុងកាលៈទេសៈដ៏តានតឹងនេះ ក្រសួងកិច្ចការនារី ព្រមជាមួយប្រជាពលរដ្ឋខ្មែរទាំងអស់ សូមសម្តែងការដឹងគុណយ៉ាងជ្រាលជ្រៅបំផុត ចំពោះវីរៈភាពដ៏អង់អាចក្លាហានរបស់កងទ័ពជួរមុខ ដែលបានលះបង់គ្រប់បែបយ៉ាង ដោយឥតរួញរា ក្នុងបុព្វហេតុការពារជាតិមាតុភូមិ ក្រោមការចង្អុលបង្ហាញដឹកនាំបញ្ជាផ្ទាល់របស់សម្តេចតេជោ អគ្គភស្តុភាជាន់ខ្ពស់នៃកងកម្លាំងប្រដាប់អាវុធ និងសម្តេចធិបតី នាយករដ្ឋមន្រ្តីនៃព្រះរាជាណាចក្រកម្ពុជា។

លោកស្រីបានអំពាវនាវឱ្យប្រជាពលរដ្ឋទាំងក្នុង និងក្រៅប្រទេសជឿជាក់លើចំណាត់ការ និងវិធានការនានារបស់រាជរដ្ឋាភិបាល ក្នុងការដោះស្រាយបញ្ហា ចៀសវាងចែករំលែកព័ត៌មានក្លែងក្លាយ គ្មានប្រភពច្បាស់លាស់ ដែលនាំបង្កចលាចលក្នុងសង្គម។ ជាពិសេស ត្រូវរួបរួមសាមគ្គីគ្នា ក្នុងស្មារតីជាតិខ្មែរតែមួយ ដើម្បីគាំទ្រដល់កងទ័ពជួរមុខ និងជួយដល់ជនភៀសសឹក ដែលកំពុងជួបការលំបាក។

ក្នុងឱកាសនោះដែរ លោកស្រីបានសម្តែងការសោកស្តាយ និងរំលែកទុក្ខដ៏ក្រៀមក្រំបំផុតជាមួយក្រុមគ្រួសារកងទ័ពដែលបានពលីក្នុងសមរភូមិ និងបានបួងសួងដល់វិញ្ញាណក្ខន្ធវីរៈកងទ័ព សូមឱ្យបានសោយសុខក្នុងសុគតិភពកុំបីឃ្លៀងឃ្លាតឡើយ៕