អគ្គលេខាធិការអាស៊ាន៖ យើងមិនអាចមិនខ្វល់ពីការបន្តប្រយុទ្ធគ្នារវាងកម្ពុជា និងថៃបានទេ

«យើងមិនអាចមិនខ្វល់ពីការបន្តប្រយុទ្ធគ្នារវាងប្រទេសសមាជិកទាំងពីរបានទេ»។ នេះជាការថ្លែងរបស់អគ្គលេខាធិការអាស៊ាន លោកបណ្ឌិត កៅ គឹមហួន ដែលកំពុងបង្ហាញការព្រួយបារម្ភចំពោះជម្លោះប្រដាប់អាវុធរាលដាលកាន់តែខ្លាំងរវាងកម្ពុជា និងថៃ ដែលជារដ្ឋសមាជិកក្នុងសមាគមប្រជាជាតិអាស៊ីអាគ្នេយ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត កៅ គឹមហួន បាននិយាយថា ប្រធានអាស៊ាន និងមេដឹកនាំប្រទេសដៃគូខាងក្រៅ រួមទាំងអគ្គលេខាធិការអង្គការសហប្រជាជាតិ បានអំពាវនាវឱ្យមានការត្រឡប់ទៅរកបទឈប់បាញ់ជាបន្ទាន់ ដើម្បីបន្ធូរបន្ថយភាពតានតឹង និងត្រឡប់ទៅរកកិច្ចសន្ទនា និងការទូតឡើងវិញ ខណៈប្រជាជនអាស៊ាន ពិសេសសហគមន៍រស់នៅតាមព្រំដែននៃប្រទេសទាំងពីរ ដែលជាជនរងគ្រោះ បានទទួលរងផលប៉ះពាល់យ៉ាងធ្ងន់ធ្ងរ ដោយសារការប្រយុទ្ធកំពុងបន្ត។

តាមរយៈសន្ទរកថាថ្លែងក្នុងវេទិកាមួយ នៅឯលេខាធិការដ្ឋានអាស៊ាន ក្នុងទីក្រុងហ្សាកាតា ប្រទេសឥណ្ឌូណេស៊ី កាលពីថ្ងៃទី១១ ខែធ្នូ ឆ្នាំ២០២៥ លោកបណ្ឌិត កៅ គឹមហួន លើកឡើងថា យើងត្រូវតែផ្តល់ឱកាសដល់សន្តិភាព ដោយលោកបានសង្កត់ធ្ងន់ថា នៅចំពោះមុខបញ្ហាដ៏ធ្ងន់ធ្ងរនេះ អាស៊ានត្រូវតែប្រកាន់ខ្ជាប់ចំពោះគោលការណ៍មូលដ្ឋានរបស់ខ្លួន ដូចមានចែងនៅក្នុងធម្មនុញ្ញអាស៊ាន គឺការគោរពតាមដំណោះស្រាយជម្លោះដោយសន្តិវិធី ហើយពង្រឹងកិច្ចសហប្រតិបត្តិការ និងធានាថា សន្តិភាព និងស្ថិរភាពក្នុងតំបន់។

ក្នុងន័យនេះ លោកអគ្គលេខាធិការអាស៊ាន ទទូចដល់កម្ពុជានិងថៃឱ្យទម្លាក់ចោលនូវអរិយភាពដាក់គ្នា ហើយងាកមករកសន្តិភាព ដោយរក្សានូវភាពអត់ធ្មត់ឱ្យអស់លទ្ធភាព និងបន្តធ្វើការរួមគ្នាឆ្ពោះទៅរកបំណងប្រាថ្នារួមរបស់ប្រជាជនទាំងពីរ ដែលចង់បានសន្តិភាព ស្ថិរភាព សាមគ្គីភាព និងវិបុលភាព។

អគ្គលេខាធិការអាស៊ាន ក៏មិនភ្លេចអរគុណចំពោះប្រទេសម៉ាឡេស៊ី សម្រាប់ភាពជាអ្នកដឹកនាំយ៉ាងប្តូរផ្តាច់នៅឆ្នាំនេះ និងជាពិសេសលោកនាយករដ្ឋមន្ត្រីម៉ាឡេស៊ី  Anwar Ibrahim សម្រាប់កិច្ចខិតខំប្រឹងប្រែងសម្របសម្រួល ក្នុងដំណោះស្រាយជម្លោះប្រទេសទាំងពីរនេះ៕

ដោយ៖ ធឿន វ៉ាន់សុង