អង្គភាពរដ្ឋ ក្រុមហ៊ុនឯកជន និងសប្បុរសជនជាង២៣០ បានបរិច្ចាគស្បៀង ជូនកងទ័ពជួរមុខនិងជនភៀសសឹក

ការរៀបចំទទួលអំណោយដែលមានទាំងថវិកា ស្បៀងអាហារ គ្រឿងឧបភោគ បរិភោគ សម្ភារៈប្រើប្រាស់នានា ព្រមទាំងថ្នាំពេទ្យ ដែលរៀបចំដោយរដ្ឋបាល រាជធានីភ្នំពេញ គិតមកដល់ថ្ងៃទី២២ធ្នូនេះ មាន អង្គភាពរដ្ឋ ក្រុមហ៊ុនឯកជន និងសប្បុរសជននានានៅរាជធានីចំនួនជាង២៣០ហើយ បានបរិច្ចាគ ដើម្បីយកទៅចែកជូនដល់វីរកងទ័ពជួរមុខ ដែលបាននឹងកំពុងខិតខំ តស៊ូការពារបន្ទាត់ព្រំដែនកម្ពុជា យ៉ាងអង់អាចក្លាហាន មុះមុត ប្រឆាំងនឹងសត្រូវឈ្លានពាន ប្រកបដោយស្មារតី ស្នេហាជាតិមាតុភូមិ និងចែកជូនបងប្អូនប្រជាពលរដ្ឋដែលត្រូវបានជម្លៀសខ្លួនមកកាន់មណ្ឌលសុវត្ថិភាពនានា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីប្រគល់និងទទួលអំណោយមនុស្សធម៌នាថ្ងៃទី២២ធ្នូ២០២៥នេះ ធ្វើឡើងក្រោមវត្តមានលោក ហួត ហៃ លោកពេញ ធារម្យ និង លោកហ៊ុន សុរិទ្ធីអភិបាលរង តំណាង ឃួង ស្រេង អភិបាលរាជធានីភ្នំពេញ នៅក្នុងបរិវេណសាលារាជធានីភ្នំពេញ។

អំណោយដែលទទួលថ្ងៃនេះរួមមាន រដ្ឋបាលខណ្ឌឬស្សីកែវ,រដ្ឋបាលខណ្ឌទួលគោក, ក្រុមហ៊ុនស្នេថេក,និងសប្បុរជន ក្នុងស្រុកនិងនៅក្រៅស្រុកផងដែរ ដោយគិតមកដល់ម៉ោង១៦និង០០នាទីថ្ងៃទី២២ធ្នូនេះមានសប្បុរសជន ស្ថាប័ន អង្គភាពរដ្ឋនិងក្រុមហ៊ុនឯកជន ចំនួន២៣៥ហើយ បាននាំថវិកា ស្បៀងអាហារ គ្រឿងឧបភោគ បរិភោគ សម្ភារៈប្រើប្រាស់នានា ជូនមករដ្ឋបាល រាជធានីភ្នំពេញ។

ក្នុងនាមលោក ឃួង ស្រេង លោក ហួត ហៃ លោកពេញ ធារម្យ និងលោក ហ៊ុន សុរិទ្ធី បានថ្លែងនូវការអរគុណយ៉ាងជ្រាលជ្រៅចំពោះ រដ្ឋបាលខណ្ឌនិងសប្បុរសជនទាំងអស់ដែលបាននាំយកអំណោយទាំងនេះជូនមករដ្ឋបាលរាជធានីភ្នំពេញ ដើម្បីយកទៅ ចែកជូនដល់វីរកងទ័ពជួរមុខ ដែលបាននឹងកំពុងខិតខំតស៊ូការពារបន្ទាត់ព្រំដែនកម្ពុជា-ថៃ ប្រកបដោយ ភាពអង់អាចក្លាហាន មោះមុត ប្រឆាំងនឹងសត្រូវឈ្លានពាន ក្នុងស្មារតីស្នេហាជាតិមាតុភូមិ ព្រមទាំងបងប្អូន ប្រជាពលរដ្ឋជាជនភៀសសឹក។

សម្រាប់អាជ្ញាធររាជធានីភ្នំពេញ នៅតែបន្តទទួលអំណោយពីសប្បុរសជនតទៅទៀត នៅសាលារាជធានីភ្នំពេញ៕

ដោយ ៖ ស្រីរ័ត្ន