ជនជាតិចិនម្នាក់យកកាំបិតភ្ជង់ប្លន់ទូរស័ព្ទ ប្រជាពលរដ្ឋរួចរត់ឡើងទៅលើតំបូលហាង ផ្អើលសមត្ថកិច្ច

បុរសជនជាតិចិនម្នាក់ យកកាំបិតចុងស្រួចភ្ជង់ប្លន់ទូរស័ព្ទប្រជាពលរដ្ឋ ហើយព្យាយាមរត់គេចឡើងទៅអង្គុយលើតំបូលហាងលក់គ្រឿងសង្ហារឹម រួចបន្តផ្លោះឡើងទៅលើតំបូលផ្ទះប្រជាពលរដ្ឋ ក៏ត្រូវពលរដ្ឋឃាត់បានភ្លាមៗ។

ហេតុការណ៍នេះបង្កភ្ញាក់ផ្អើលកាលពីវេលាម៉ោង ០៨ នឹង ១០នាទីយប់ថ្ងៃទី ២៦ ខែធ្នូ ឆ្នាំ២០២៥ ស្ថិតនៅតាមបណ្តោយផ្លូវម៉ៅសេទុង សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ។

តាមប្រភព័ត៍មានពីប្រជាពលរដ្ឋបានអោយដឹងថា គេបានប្រទះឃើញជនសង្ស័យម្នាក់ ជាជនជាតិចិន ដៃកាន់កាំបិតចុងស្រួច ធ្វើសកម្មភាពភ្ជង់ប្លន់យកទូរស័ព្ទ ពីប្រជាពលរដ្ឋក្បែរទីតាំងខាងលើ ។ ខណៈនោះដែរ បន្ទាប់ពីប្លន់ទូរស័ព្ទបានសម្រេច ជនសង្ស័យក៏ធ្វើសកម្មភាព រត់ទៅតាមក្រោយបាត់ស្រមោល ។ ប៉ុន្តែមួយសន្ទុះក្រោយ ក៏ឃើញនៅលើតំបូលហាងលក់គ្រឿងសង្ហារឹម រួចកំពុងអង្គុយនិយាយនឹងមានកាយវិការ ម្នាក់ឯង ដូចមនុស្សសតិមិនគ្រប់ ។ ភ្លាមៗ ប្រជាពលរដ្ឋធ្វើការស្ទាក់ចាប់ជនជាតិចិនខាងលើ បានសម្រេច រួចប្រញាប់ប្រញាល់រាយការណ៍ជូនសមត្ថកិច្ច ចុះមកកាន់ទីតាំងកើតហេតុផងដែរ។

ក្រោយកើតហេតុ សមត្ថកិច្ចមូលដ្ឋានបានមកដល់ទីតាំងខាងលើ បាននាំខ្លួនជនសង្ស័យទៅកាន់ស្នាក់ការប៉ុស្តិ៍ទំនប់ទឹក ដើម្បីសាកសួរបន្ត នឹងចាត់ការតាមនីតិវីធីច្បាប់៕ អត្ថបទ ៖ រដ្ឋា