ព័ត៌មានជាតិ

អភិបាលខេត្តកណ្តាលដឹកនាំក្រុមគ្រូពេទ្យចុះប្រមូលយកសំណាកអាជីវករ៣៥០នាក់នៅផ្សារពហុកីឡាដ្ឋាន

បានផុស

៥ years មុន

នៅ

ថ្ងៃចន្ទ ១៩ មេសា ២០២១

ដោយ

ដើម្បីប្រាកដថា អាជីវករ ដែលបាននឹងកំពុងធ្វើសកម្មភាពលក់ ដូរ នៅក្នុងផ្សារបណ្តោះអាសន្ន កីឡដ្ឋាន ក្រុងតាខ្មៅនេះ គ្មាននរណាម្នាក់មានផ្ទុកវីរុសកូវីដ-១៩ នាល្ងាចថ្ងៃទី១៩ ខែមេសា ឆ្នាំ២០២១ លោក គង់ សោភ័ណ្ឌ អភិបាលខេត្តកណ្ដាល បានដឹកនាំក្រុមការងារពាក់ព័ន្ធ និងក្រុមគ្រូពេទ្យជំនាញ ចុះប្រមូលយកបងប្អូនអាជីវករប្រមាណ ៣៥០នាក់ យកសំណាកធ្វើតេស្តរកវីរុសកូវីដ-១៩។

អាជីវករ ដែលបានយកសំណាករួច ហើយលទ្ធផលអវិជ្ជមាន និងមានលិខិតបញ្ជាក់ នឹងត្រូវអនុញ្ញាតឱ្យចូលលក់បន្តនៅក្នុងផ្សារនេះ។

លោកគ្រុយ ម៉ាឡែន នាយកសាលាខេត្តកណ្តាលបានប្រាប់បន្ថែមថា នេះមិនមែនជាផ្សារទេគ្រាន់តែជាកន្លែងដែលរៀបចំថ្មីជំនួសផ្សារដែលយើងបិទសម្រាប់ឲ្យប្រជាពលរដ្ឋអាចលក់ដូរបន្លែបង្ការចំណីអាហារឬទំនិញសម្រាប់ផ្គត់ផ្គង់ជីវភាពរស់នៅប៉ុណ្ណោះ។

លោកបានបន្តថា «ការរៀបចំទីតាំងនោះមានភាពស្រឡះល្អហើយអាជ្ញាធរយើងបានរៀបចំទៅតាមគម្លាតបច្ចេកទេសសុខាភិបាល។ ប៉ុន្តែការលក់ដូរអាជីវករមួយថ្ងៃពីរនេះដំណើរការទៅបានដោយបានល្អប្រសើរតែពិនិត្យឃើញអាជីវករមួយចំនួនពិនិត្យកម្តៅទៅឃើញមានភាពមិនប្រក្រតី។ ដូច្នេះយើងបានចាត់វិធានការយកសំណាកអាជីវករទាំងអស់ទៅពិនិត្យធ្វើតេស្តតាមរយៈឧបករណ៍តេស្តលឿនរហ័សដើម្បីរកកូវីដ១៩តែម្តង»៕

ដោយ ៖ សំអឿន