ពលរដ្ឋ​ងាកមក​រកទិញ​បន្លែ ត្រីសាច់​តាម​ផ្សារ​ចុង​សប្តាហ៍ កាន់តែមានការ​គាំទ្រពី​អតិថិជន

អ្នកស្រី គឹម សុខា អាជីវករលក់ក្នុងផ្សារ ១៣ មករា ក្នុងក្រុង​បាត់ដំបង​បានត្អូញត្អែរថា ឲ្យតែដល់ថ្ងៃសៅរិ៍​ និងថ្ងៃអាទិត្យ បន្លែគ្រប់មុខរបស់អ្នកស្រីលក់មិនសូវដាច់ទេ ខណៈ​អតិថិជនបានសម្រុកចូលរកទិញ​ទំនិញ​នៅ​ផ្សារចុងសប្តាហ៍ទើបនៅតាមទីផ្សារទូទៅ​មួយចំនួនមិនសូវមានអតិថិជនដូច​សព្វដង។

អ្នកស្រី គឹម សុខា ដែល​មាន​លក់បន្លែ ត្រី សាច់ បានកត់សម្គាល់ថា រៀងរាល់​ចុងសប្តាហ៍អតិថិជនសម្រុកទៅផ្សារចុងសប្តាហ៍ច្រើន​ ទើបតាមទីផ្សារនានាស្ងាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«នៅ​ផ្សារចុងសប្តាហ៍ មាន​លក់ស្ទើរ​​គ្រប់​មុខ​ទំនិញចាំបាច់​មានទាំង​បន្លែ ត្រីសាច់ស្រស់ៗយ៉ាងសម្បូរបែប ហើយអតិថិជនចូលទៅទិញ​ច្រើន»។ អ្នកស្រី គឹម សុខា បញ្ជាក់។

បើតាមមន្ត្រីពាណិជ្ជកម្មខេត្តបាត់ដំបង ការបើកឲ្យមានទីផ្សារចុងសប្តាហ៍នេះ ក្នុងគោលបំណងពង្រឹងដល់សហគមន៍កសិកម្ម ក្នុងការរកចំណូលតាម​រយៈ​ការដាំដុះបន្លែសរីរាង្គប្រកបដោយអនាម័យនិងគុណភាពខ្ពស់ សម្រាប់​ទ្រទ្រង់ដល់សុខមាលភាពរបស់ប្រជាជន។

ដើម្បី​លើកកម្ពស់ដល់ប្រជាកសិករដែលចិញ្ចឹមត្រីនិងសត្វក្នុងស្រុក មន្រ្តី​ជំនាញបាន​បំផុស​ដល់​កសិករតាមបណ្តាស្រុកមួយចំនួន​ឲ្យ​ចិញ្ចឹមមាន់ស្រែ ដើម្បីនាំ​ចូលមក​លក់​លើទីផ្សារចុងសប្តាហ៍ ឆ្លើយតបតាមតម្រូវការរបស់អតិថិជនដែល​មានកំណើន​​គាំទ្រ​ពីមួយសប្តាហ៍ទៅមួយសប្តាហ៍។

អ្នកស្រី ចាន់ នី ពលរដ្ឋរស់នៅក្នុងក្រុង​បាត់ដំបង​បាន​ឲ្យ​ដឹង​ថា ជាទូទៅឲ្យតែដល់ថ្ងៃសៅរិ៍​និងថ្ងៃអាទិត្យ អ្នកស្រី​តែងតែទៅផ្សារចុងសប្តាហ៍មិនដែលខកខានទេ ព្រោះបន្លែត្រីសាច់មើលទៅគួរឲ្យចង់បរិភោគ។

«និយាយទៅគឺស្រស់ៗតែម្តង ហើយតម្លៃក៏សមរម្យ ម្យ៉ាងទៀតទិដ្ឋភាព​ក៏​គួរឲ្យស្រស់ស្រាយមានមនុស្សអ៊ួអរដើរចុះឡើង សម្លឹងមើលកសិផលក្នុងស្រុកចម្រុះ ហើយក៏ឃើញ​ម្នាក់​ៗ​ទិញច្រើន»។

ផ្សារផលិតផលខ្មែរនៅខេត្តបាត់ដំបង សហការរៀបចំដោយមន្ទីរពាណិជ្ជកម្មខេត្តបាត់ដំបង និងសមាគមនិរន្តរភាពដើម្បីជីវិត ដែល​បើក​ដំណើរការ​រៀងរាល់ថ្ងៃសៅរ៍ និងថ្ងៃអាទិត្យ ចាប់ពីម៉ោង ៦:០០​ព្រឹក ដល់ ៦:០០ ល្ងាច នៅបរិវេណខាងមុខ​ផ្សារទំនើបបុរីថ្មីតាមបណ្តោយផ្លូវលេខ៣ ក្រុងបាត់ដំបង ខេត្តបាត់ដំបង៕

អត្ថបទ÷សៅ សារិទ្ធ