ផ្ទុះកាំជ្រួច បាញ់អបអរថ្ងៃឆ្លងឆ្នាំនៅបាងកក របួសមនុស្សច្រើននាក់

មនុស្សច្រើននាក់បានរងរបួសដោយសារតែផ្ទុះកាំជ្រួចបាញ់អបអរថ្ងៃឆ្លងឆ្នាំនៅទីក្រុងបាងកក។

តាមការផ្សាយរបស់ Bangkok Post នៅថ្ងៃសុក្រទី២ខែមករាឆ្នាំ២០២៦ ហេតុការណ៍នេះកើតឡើងនៅផ្លូវ Sukhumvit 71 ក្នុងខ័ណ្ឌ Watthana។

ប៉ូលិសបញ្ជាក់ថា កាំជ្រួចបាញ់អបអរនោះ គឺជាកាំជ្រួចខុសច្បាប់គ្មានស្តង់ដា។ ការផ្ទុះបានបណ្តាលឲ្យមនុស្ស៧នាក់រងរបួស ក្នុងនោះមាន៤នាក់ព្យាបាលនៅហ្នឹងកន្លែង ចំណែក៣នាក់ទៀតបញ្ជូនទៅមន្ទីរពេទ្យ។

ស្របពេលជាមួយគ្នានោះ ករណីមួយទៀតនៅខេត្ត Suphan Buri ឯណោះ ប៉ូលិសក៏ឆ្មក់ចូលកន្លែងផលិតកាំជ្រួចខុសច្បាប់មួយផងដែរ ដោយរឹបអូសបានម្សៅធ្វើកាំជ្រួចជាង ២០០លីត្រ។

ការវាយឆ្មក់នេះកើតឡើង បន្ទាប់ពីពលរដ្ឋដាក់ពាក្យបណ្តឹង ដោយខ្លាចថា បើគ្មានចំណាត់ការទេនោះ ថ្ងៃណាមួយកាំជ្រួចនៅទីនោះនឹងផ្ទុះ បណ្តាលឲ្យមានមនុស្សស្លាប់ជាក់ជាមិនខាន៕

អត្ថបទ៖ សុខ សុវណ្ណ