ចិន និងវៀតណាមជំរុញទំនាក់ទំនងពាណិជ្ជកម្ម និងហិរញ្ញវត្ថុ

ចិន និងវៀតណាម​ប្ដេជ្ញាជំរុញទំនាក់ទំនងវិនិយោគ ពាណិជ្ជកម្ម និងហិរញ្ញវត្ថុ ក្រោយជំនួបរវាងរដ្ឋមន្រ្តីក្រសួងហិរញ្ញវត្ថុវៀតណាម លោក Nguyễn Văn Thắng និងឯកអគ្គរដ្ឋទូតចិនប្រចាំវៀតណាម លោក He Wei។ នេះបើតាមការចុះផ្សាយរបស់កាសែត Viet Nam News កាលពីថ្ងៃសៅរ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Thang បានគូសបញ្ជាក់ពីកំណើនដ៏រឹងមាំនៃទំនាក់ទំនងសេដ្ឋកិច្ចវៀតណាម-ចិន។ បច្ចុប្បន្ន វិនិយោគិនចិនមានគម្រោងសកម្មជាង ៦ ០០០ នៅ​វៀតណាម ដែលមានតម្លៃជិត ៣៥ ​ប៊ីលានដុល្លារអាមេរិក​។ ពាណិជ្ជកម្មទ្វេភាគីបានកើនឡើងក្នុងរយៈពេល ១០ ខែដំបូងនៃឆ្នាំ ២០២៥ ដោយលើសពី ២០០ ​ប៊ីលានដុល្លារ ដោយវៀតណាមនាំចេញទៅចិន មាន​ប្រហែល ៥៧ ​ប៊ីលានដុល្លារ​ និងនាំចូលមកវិញ ប្រហែល ១៥០ ប៊ីលានដុល្លារ។

លោកបានថ្លែងអំណរគុណដល់រដ្ឋាភិបាល និងប្រជាជនចិនចំពោះកញ្ចប់ជំនួយចំនួន ៥០០​ ០០០ ដុល្លារ ដើម្បីជួយប្រទេសវៀតណាមឱ្យងើបឡើងវិញពីគ្រោះទឹកជំនន់ដ៏សាហាវនៅតំបន់​ភាគ​ណ្តាល ​ដោយហៅវាថាជាការឆ្លុះបញ្ចាំងពីមិត្តភាពជិតស្និទ្ធរវាងប្រទេសទាំង២។

ដោយឡែកលោក He ឯណោះវិញ បាន​ថ្លែងថា ​ទំនាក់ទំនងវៀតណាម-ចិនកំពុងចូលដល់ «ដំណាក់កាលមាសទី២​» ដោយកត់សម្គាល់ថា ក្រុមហ៊ុនចិនជាច្រើនកំពុងបង្កើនការវិនិយោគនៅ​វៀតណាម ហើយទំនាក់ទំនងសេដ្ឋកិច្ច និងពាណិជ្ជកម្មទ្វេភាគី​កំពុងរីកចម្រើន។

ឯកអគ្គរដ្ឋទូតដដែល​រំពឹងថា ទំនាក់ទំនងសេដ្ឋកិច្ច ពាណិជ្ជកម្ម និងហិរញ្ញវត្ថុរវាងចិន និងវៀតណាម​ នឹងឈានដល់កម្រិតថ្មីមួយ ដោយសង្កត់ធ្ងន់លើតួនាទីសំខាន់ដែលក្រសួងហិរញ្ញវត្ថុវៀតណាមនឹងដើរតួនាទី៕